දෙවැනි ටෙස්ට් තරගයේ පළමු දිනය අවසන්ය. දිනය නිමා වනවිට ලකුණු 314ක් ය. කඩුළු 04ක් පමණක් දැවී ගොස් ඇත. දිනයේ පූර්ණ ගෞරව ශ්රී ලංකා කණ්ඩායමටය. ලකුණු නම් ඇතිය. දුක හිතෙන්නේ අපේ උන් ශතක දැක දැක දැවී යන විටය. කුසල් සිය 10 වැනි ටෙස්ට් ශතකය අහිමිකරගත්තේය. දිමුත්ට සිය 17වැනි ටෙස්ට් ශතකය අහිමි වුනේය.
ශ්රි ලංකාව සහ බංගලාදේශය අතර මේ වනවිට චිතොගම්වල පැවැත්වෙමින් ඇති දෙවැනි ටෙස්ට් තරගයේ පලමු දිනයේ දී පිතිකරුවන්ට යෝග්ය චිතොගම් සහුර් අහමඩ් චෞද්රි ක්රීඩාංගනයේ දි කාසියේ වාසිය දිනා පිතරකරණය තේරූ ශ්රි ලංකා පිතිකරුවෝ අභියෝග රහිතව පන්දුවට පහර එල්ල කරමින් සිටිති.
ආරම්භක පිතිකරුවන් වූ නිශාන් මධුෂ්ක සහ දිමුත් කරුණාරත්න ලකුණු 96ක් ලෙස ඉහළ ආරම්භක සම්බන්ධතාවයක් ගොඩනැගී තිබෙද්දී තරගයේ මුල්ම කඩුල්ල ලෙස නිශාන් මධුශ්ක දැවී ගියේය. ඔහු අවාසනාවන්ත ලෙස ලකුණු 57කට දුවද්දී දැවී යද්දී මුලු ලකුණු ගණන ලකුණු 96කි.
දෙවැනි කඩුල්ල ලෙස දිමුත් කරුණාරත්න දැවී යන්නේ ශතකය පෙනි පෙනී ය. ඔහු හතරේ පහර 11ක් සහ එක් හයේ පහරක් සමග ලකුනු 86ක් ලබා සිටිද්දී හසන් මහමුද් එවු පන්දුවක් කඩුල්ලේ වැදී දැවී ගියේය. ඒ වනවිට කුසල් සහ දිමුත් අතර දෙවැනි කඩුල්ල වෙනුවෙන් ගොඩනැගී තිබූ සම්බන්ධතාවය ලකුණු 114කි. දෙවැනි කඩුල්ල ලෙස දිමුත් දැවී යනවිට කන්ඩායමේ මුලු ලකුනු සංඛ්යාව ලකුනු 210කි.
බංගලාදේශ තරගාවලියේ දී සමස්ථයක් ලෙස අසමත් වී සිටි කුසල් මෙන්ඩිස් ලකුණු නියඟය නිමා කළ නමුත් ඔහුත් ශතකය දකිමින් දැවී ගියේය. කුසල් දැවී යන්නේ ලකුනු 93කටය. ශකීබ් අල් හසන්ගේ පන්දුවකට ස්ලිප්හි සිටි මේදි හසන් මිරාස් වටිනා උඩපන්දුවක් රැක ගත්තේය. කුසල් සිය ලකුනු 93 රැස් කරන්නේ පන්දු 150ක් තුළය. හතරේ පහර 11ක් සහ හයේ පහරක් සමගය.
සිව්වන කඩුල්ල ලෙස මැතිව්ස් ලකුණු 23කට දැවි ගියේය. පන්දු 71කට මුහුණ දුන්නේය. හතරේ පහර දෙකක් සහ හයේ පහරක් එල්ල කළේය. එහෙත් ඔහු අද පිටියට පැමිණි මොහොතේ සිට ක්රීඩා කළේ භංග වූ විශ්වාසයෙනි. ඔහුට ඉහලින් බංගලාදේශ පන්දු යවන්නෝ වූහ. මේ ලකුණු 23 ද මැතිව්ස් ලබා ගන්නේ අනූ නවයෙන් සිය කඩුල්ල බේරා ගන්නා අවස්ථා තුනක් මගහැරීමෙන් අනතුරුවය. ඒ අතර ලකුණු 14 දී පළමු ස්ලිප් ක්රීඩකයා අතින් ගිලිහී ගිය උඩ පන්දුවක් ද විය.
දිනය අවසන්වන විට දිනේෂ් චන්දිමාල් සහ ධනංජය ද සිල්වා නොදැවී පිතිකරණයේ යෙදෙමිනි. ධන්ජය හතරේ පහර 2ක් සමග ලකුණු 15කි. දිනේෂ් චන්දිමාල් හතරේ පහර දෙක්ක සහ හයේ පහර දෙකක් සමග ලකුනු 34කි.
දිනයේ අවසන් කාර්තුවේ දී බංගලාදේශ පන්දු යවන්නෝ අභියෝගාත්මක පන්දු යැවීමක නිරතවනු පෙනුණි. ධනංජය අවස්ථා දෙකක දී ඔන්න මෙන්න කොටුවෙන්නට ගියේය. කෙසේ වෙතත් චන්දිමාල් අප බොහෝ කලකට එපිට දී දුටු චන්දිමාල්ගේ විශ්වාසය පෙන්වමින් පිතිකරණයේ නිරතවනු පෙනුණි.
දිනයට නියමිත පන්දු ඕවර 90 යවනවිට ටෙස්ට් රිද්මය සහිත මනරම් ඉනිමක් ශ්රී ලංකා කන්ඩායමෙන් පෙන්නුම් කර ඇත. ඕවරයක සාමාන්ය ලකුණු ලබා ගැනීමේ වේගය ලකුණු 3.48කි.
පස්වන කඩුල්ල වෙනුවෙන් මේ වනවිට ධනංජය සහ චන්දිමාල් අතර ලකුණු 25ක සම්බන්ධයක් ගොඩනැගී ඇත. පන්දු යැවීමේ දී මෙම සිය මංගල ටෙස්ට් තරගයට කැඳවූ හසන් මහමුද් පන්දු ඕවර 17ක් යවා ලකුණු 64කට කඩුළු දෙකකි. ශකීබ් අල් හසන් පන්දු ඕවර 18ක් යවා ලකුණු 60කට කඩුල්ලකි. නිශාන් මධුශ්ක දැවී යන්නේ දුවන්නට ගොස්ය.
පිතිකරණයට උචිත තණ තීරුවේ හෙට දවස තීරණාත්මකය. හෙට වැඩි කාලයක් ශ්රි ලංකා කණ්ඩායම පිටියේ රැඳි සිටියහොත් එය ජයග්රාහී අවසානයක් සම්බන්ධව බලාපොරොත්තු දැල්වීමක් වන්නට පුලුවන. පිළිගත් පිතිකරුවෙක් ලෙස කමිඳු මෙන්ඩිස් පිටියට පැමිණීමට නියමිතව ඇත. ඔහුගෙන් අනතුරුව විශාල පිතිකරණ ප්රාතිහාර්යයන් බලාපොරොත්තු වීම ප්රායෝගික නොවේ. ප්රභාත් ජයසූරිය, අසිත ප්රනාන්දු, ලහිරු කුමාර සහ විශ්ව ප්රනාන්දුගෙන් ලකුණු ආවොත් එන සෑම ලකුණක්ම බෝනස් එකක් සේ වටිනු ඇත.
තණතීරුව ගැන අදහස් පලකල ධනංජය ඊයේ කීවේ තරගයේ මුල් දින තුන පිතිකරණයට උචිත සේ හැසිරුණ ද දෙවැනි තුන්වැනි දින දඟ පන්දු යවන්නන්ගේ වාසියට හැසිරෙනු ඇති බවය. මුල් ටෙස්ට් තරගයේ දී පූර්ණ වේගපන්දු ප්රහාරයකින් සාර්ථක වුව ද මෙම තරගයේ වැඩි බරක් ප්රභාත් ජයසූරිය වෙත පැවරෙනු ඇත.
