කීර්ති ප්රනාන්දු –
සුදු බිත්තරයක් රුපියල් 45 සහ රතු බිත්තරයක් රුපියල් 46 බැගින් තොග මිලට වෙළදුන්ට අලෙවි කිරීමට සමස්ත ලංකා බිත්තර නිෂ්පාදකයින්ගේ සංගමය තීරණය කළ බව සමස්ත ලංකා බිත්තර නිෂ්පාදකයින්ගේ සංගමයේ සභාපති ආර්. එම් . සරත් රත්නායක පවසයි .
ඊයේ ( 16) තම සංගමයේ අධ්යක්ෂක මණ්ඩලය රැස්වී මෙම තීරණයට එළඹි බව ඔහු පවසයි .
ඒ අනුව බිත්තරයක් රුපියල් 50කට අඩුවෙන් සිල්ලර මිලට ලබාගැනීමට පාරිභෝගිකයන්ට අවස්ථාව ලැබී ඇතැයි ඔහු වැඩිදුරටත් කියාසිටී .
බිත්තර රුපියල් 50ට අඩුවෙන් ලබාදීමේ වැඩපිළිවෙළ සාර්ථක කරගැනීම සඳහා පාරිභෝගික සේවා අධිකාරිය සති දෙකක් යන තුරු බිත්තර වැටලීම් සිදු නොකර බිත්තරයක් රුපියල් 50ට අඩුවෙන් පාරිභෝගික ජනතාවට ලබාදීමට අවසර ලබාදෙන්නේ නම් පාලන මිල දක්වා බිත්තර මිල පහත වැටෙනු ඇතැයි ඔහු විශ්වාසය පළ කළේය .
මේ අතර පාරිභෝගික සේවා අධිකාරිය මගින් බිත්තර වැටලීම් සති දෙකකට වත් සිදු නොකිරීමෙන් වැඩි මිලට බිත්තර අලෙවි කිරිමද ඉබේම නතර වන බව සභාපතිවරයා වැඩිදුරටත් කියා සිටියේය .
දැනට පාරිභෝගිකයාට හා බේකරි වලට අවශ්ය බිත්තර තොග හිඟයකින් තොරව ලබා දීමේ හැකියාව බිත්තර නිෂ්පාදකයින් සතුව ඇති බවත් පෙන්වා දුන් සභාපතිවරයා රටට අවශ්ය බිත්තර තොග සැපයීමේ වැඩපිළිවෙළ සාර්ථක කර ගැනීම සඳහා පාරිභෝගික සේවා අධිකාරියේ සහයෝගය අපේක්ෂා කරන අතර රටින් බිත්තර ගෙන ඒමට අවශ්ය නොවන බවත් පැවසීය .
