මනම්පිටිය නිමල් ජයරත්න –
-
පොළොන්නරුවේ ප්රධාන පෙළේ වී මෝල් හිමියන්ගේ අරක්කු බෝතලයට, බත් පැකට් එකට, මුදල්වලට යටවී මෙම අඛණ්ඩ උපවාසය ආරම්භ කර ඇති බවට කෘෂිකර්ම ඇමති ඇමැතිවරයා මාධ්යයට සිදු කර ඇති ප්රකාශය සමස්ත පොලොන්නරුව ගොවි ජනතාව හෙළා දකිනවා.. ඔහු තම ප්රකාශය ඉල්ලා අස්කර ගත යුතුයි…
-
කාබනික වගාවක් නම් ඉරඟුවලට රසායනික පොහොර ලැබෙන්නෙ කොහොම ද?. පැහැදිලි කරන්න…
රසායනික පොහොර ලබාදෙන ලෙසට රජයට බලකරමින් ඇළහැර සහ මොරගහකන්ද ගොවිජන ව්යාපාරයේ රාජ්ය ගොවි සංවිධාන සහ ස්වාධීන ගොවි සංවිධාන හතළිස් එකක් ඒකාබද්ධව ආරම්භ කර ඇති අඛණ්ඩ උපවාසය තව දින දෙක තුනකින් මාරාන්තික උපවාසයක් බවට පත්කරන බව මොරගහකන්ද ගොවිජන සම්මේලනයේ සභාපති ඩබ්ලිව්.ජී.අමරසේන බණ්ඩාර අද (31) උදෑසන විශේෂ ප්රකාශයක් කරමින් සඳහන් කළේය.
ඉකුත් 24 වෙනිදා, ඇලහැර සහ මොරගහකන්ද ගොවිජන ව්යාපාරවල රාජ්ය හා ස්වාධීන ගොවි සංවිධාන 41ක නියෝජිතයින් පිරිසක් මෙවර මහ කන්නයේ වී වගා කිරීමට අවශ්ය රසායනික පොහොර, කෘමිනාශක, වල්නාශක ලබා දෙන ලෙසට රජයට බලකරමින් එම අඛණ්ඩ උපවාසය ඇලහැර නගර මධ්යයේ ආරම්භ කළහ.
තම ගොවීන් සිදුකරන මෙම අඛණ්ඩව උපවාසයට පොලොන්නරු දිස්ත්රික් ආණ්ඩු පක්ෂ පාර්ලිමේන්තු මන්ත්රී අමරකීර්ති අතුකෝරල පැමිණිය ද ඔහුගෙන් නිසි විසඳුමක් තමන්ට නොලැබුන බවත්, ගොවිජන ජනතාවට රසායනික පොහොර ලබාදීමට රජය කටයුතු නොකළොත් තම ගොවි සංවිධාන සියල්ල මාරාන්තික උපවාසයක් බවට මෙය පත් කරන බවත් සභාපතිවරයා සඳහන් කළේ ය.
පොළොන්නරුවේ ප්රධාන පෙළේ වී මෝල් හිමියන්ගේ අරක්කු බෝතලයට, බත් පැකට් එකට, මුදල්වලට යටවී මෙම අඛණ්ඩ උපවාසය ආරම්භ කර ඇති බවට කෘෂිකර්ම ඇමති ඇමැතිවරයා මාධ්යයට සිදු කර ඇති ප්රකාශය සමස්ත පොලොන්නරුව ගොවි ජනතාව හෙළා දකින බවත්, ඔහු තම ප්රකාශය ඉල්ලා අස්කර ගන්නා ලෙසත් මොරගහකන්ද ගොවිජන සම්මේලනයේ සභාපතිවරයා සඳහන් කළේය.
රසායනික පොහොර නොදෙන බවට පවසා රජය ඉරිඟු වගාව සඳහා රසායනික පොහොර මෙට්ට්රික් ටොන් 5000 ක් අනුරාධපුරයට පමණක් යැවීමෙන් පෙනී යන්නේ මෙම රජය ඉරිඟු වගාවට ප්රමුඛස්ථානය දී වී වගාව මෙරටින් තුරන්කර චීන ගිවිසුම් අනුව ක්රියාකරන බව දැයි ඔහු සිය ගොවි සංවිධානය වෙනුවෙන් විමසයි.
මෙම අඛණ්ඩ ගොවි උපවාසය සඳහා දිඹුලාගල බුද්ධ ශ්රාවක සංඝ සභාවේ ස්වාමීන් වහන්සේලාගේ මෙන්ම පොළොන්නරුව දිස්ත්රික්කයේ විහාරස්ථාන රැසක විහාරාධිපති ස්වාමින් වහන්සේලාගේත්,ස් වාමීන්වහන්සේලාගේත්, සහයෝගය ආශිර්වාදය ලැබී තිබීම විශේෂත්වයකි.
මෙම අඛණ්ඩ ගොවි උපවාසය සඳහා සහය පළකරමින් ඇලහැර ප්රදේශයේ විහාරස්ථාන දෙකක විහාරාධිපති ස්වාමීන් වහන්සේලා දෙනමක් වන ඉඳුරුවේ අස්සජි නාහිමියන් සහ සියඹලාගොඩ ධම්මදස්සි නාහිමියන්ද උපවාසය නිරත ගොවීන් සමග සුළු වේලාවක් අසුන් ගැනීමට කටයුතු කළහ.
