මාර්ගගත ක්රමයට විදුලි බිල්පත් ගෙවීමට පහසුකම් සලසා ඇති විදුලිබල මණ්ඩල වෙබ් අඩවියේ ගෙවීම් දොරටු හැක් කර රුපියල් කෝටි දහයකට අධික මුදලක් වංචා කිරීමේ චෝදනා මත 26 හැවිරිදි හිටපු හමුදා සෙබලෙක් අත්අඩංගුවට ගැනීමට අපරාධ පරීක්ෂණ දෙපාර්තමේන්තුවේ පරිගණක අපරාධ කොට්ඨාසය කටයුතු කර ඇත.
පෙරේදා (27) සවස මෙසේ අත්අඩංගුවට ගෙන ඇත්තේ වසර තුනක් පමණ හමුදාවේ සේවය කර ඇති ලුණුගම්වෙහෙර ප්රදේශයේ පදිංචි 26 හැවිරිදි තරුණයෙකි.
ඔහු තාවකාලිකව කඩුවෙල ප්රදේශයේ පදිංචි වී සිට රාත්රී සමාජශාලාවල හැසිරෙමින් හඳුනාගන්නා කෝටිපති ව්යාපාරිකයන් සමග මිතුරුව ඔවුන්ගේ ව්යාපාරවල විදුලි බිල් අන්තර්ජාලය හරහා ගෙවීමේ දී සියයට විසි පහක වට්ටමක් ලබා දෙන බව පවසා මෙම වංචාව සිදුකර ඇත.
විදුලිබල මණ්ඩල වෙබ් අඩවියේ ගෙවීම් දොරටුවේ තාක්ෂණික දුර්වල ස්ථානයක් හඳුනාගෙන එම වෙබ් අඩවිය හැක් කර මුදල් ගෙවීමකින් තොරව මුදල ගෙවූ බව පෙන්වන බිල්පත් ලබාගෙන එම බිල්පත් අදාල ව්යාපාරිකයන් වෙත ලබා දී මුලු මුදලම තමන්ගේ සාක්කුවේ දමා ගැනීමට මෙම පුද්ගලයා කටයුතු කර ඇතැයි විමර්ශන අංශ පවසයි.
මෙම වංචාවට සම්බන්ධ පුද්ගලයින් අතර කෝටි එක හමාරක් පමණ විදුලි බිලක් ගෙවීමට තිබූ පොලොන්නරුව ප්රදේශයේ ව්යාපාරිකයෙක් ද වූ බව හඳුනාගෙන ඇත.
සැකකරු මෙම වංචාව සිදුකර ඇත්තේ සැප්තැම්බර් 18 සහ නොවැම්බර් 25 අතර බවට තොරතුරු හෙළි වී තිබේ.
මාර්ගගත ක්රමයට ලද ගෙවීම් සටහන් සහ බැංකුවට බැරවු මුදල් අතර ඇති වෙනසක් විදුලිබල මණ්ඩලයේ ගිණුම් අංශයට පෙනී යෑම හේතුවෙන් ඒ සම්බන්ධව නොවැම්බර් 25 වැනිදා කළ පරීක්ෂාවක දී පෙනී ගොස් ඇත්තේ විදුලි පාරිභෝගිකයින් 400කගේ පමණ ගෙවීම් පද්ධතිය තුළ සටහන් වී ඇතත් මුදල බැංකුවට බැරවී නැති බවය. වෙබ් අඩවිය හැක් කර ඇති බව ඔවුන්ට පෙනී ගොස් ඇත්තේ එවිටය.
නොවැම්බර් 28 වැනිදා මේ සම්බන්ධව විදුලිබල මණ්ඩලය අපරාධ පරීක්ෂණ දෙපාර්තමේන්තුවට පැමිණිල්ලක් ගොනු කර තිබිණි.
මේ සම්බන්ධව විමර්ශන සිදුකළ අපරාධ පරීක්ෂණ දෙපාර්තමේන්තුව මෙම හිටපු හමුදා සෙබල තරුණයා අත්අඩංගුවට ගෙන තිබේ.
මූලික විමර්ශනවලින් අනතුරුව අත්අඩංගුවට ගෙන අධිකරණයට ඉදිරිපත් කළ සැකකරු ලබන මස 05 වැනිදා දක්වා බන්ධනාගාරගත කිරීමට කොළඹ අතිරේක මහේස්ත්රාත් රජින්ද්රා ජයසූරිය නියෝගක කර තිබිණි.
විදුලිබල මණ්ඩලයේ වෙබ් අඩවිය යථා තත්ත්වයට පත්කරන්නා තුරු අන්තර්ජාලය හරහා සිදුකරන ගෙවීම් අත්හිටුවා ඇත.
