මනම්පිටිය නිමල් ජයරත්න –
පොළොන්නරුව වැලිකන්ද ගල්කන්ද ප්රදේශයේදී 12 වෙනිදා සවස පොලිස් වෙඩි ප්රහාරයකින් මියගිය 26 වියති තරුණයාගේ පශ්චාත් මරණ පරීක්ෂණ කටයුතු පොළොන්නරුව මහ රෝහලේදී අද (13) සිදු කිරීමට කටයුතු කර ඇති බව වැලිකන්ද පොලිසිය කියයි.
වැලිකන්ද ගල්කන්ද ප්රදේශයේදී මෙම සැකකරු අත්අඩංගුවට ගැනීමට යාමේදී නිවසේ තිබූ මන්නා පිහියක් රැගෙන පොලිස් නිලධාරීන්ට පහර දීමට යන අවස්ථාවේදී සිදුකළ වෙඩි තැබීමකින් මෙම තරුණයා මියගිය බව වැලිකන්ද පොලිසිය සඳහන් කරයි.
මෙම වෙඩි ප්රහාරයෙන් මියගොස් ඇත්තේ, අංක 93 කන්දකාඩු, සිංහපුර ලිපිනයේ පදිංචිව 26 වියති ගාර්දි අම්බ්රෝඩ් කංකානම්ගේ ටිෂාන් යන අය බව පොලිසිය සඳහන් කරයි.
වැලිකන්ද කුඩාපොකුණ ප්රදේශයේ සිට, හමුදා ඇදුමට සමාන ඇඳුමින් සැරසී තිදෙනකු යතුරු පැදියකින් ගමන් කරන අවස්ථාවේදී පොලිසිය යතුරුපැදිය නතර කිරීමට උත්සාහ දරා තිබේ.
පොලිස් අණ නොතකා ධාවනය කෙරු යතුරු පැදියේ දෙදෙනෙකු එම අවස්ථාවේදී පලාගිය අතර, යතුරු පැදිය පදවාගෙන ගිය පුද්ගලයා ඔහුගේ නිවසට ගොස් මන්නා පිහියක් ගෙන ඔවුන් පිටිපස ලුහුබැඳ ආ පොලිස් නිලධාරීන්ට පහර දීමට යන අවස්ථාවේදී පොලිස් නිලධාරින් සිය ජීවිත ආරක්ෂාව උදෙසා වෙඩි තබා තිබේ.
එහිදී පොළොන්නරුව පොලිස් රථ වාහන අංශයේ පොලිස් සැරයන් වසන්ත යන අය විසින් මෙම පුද්ගලයාට වෙඩි තබා ඇති අත ඔහු සමග රාජකාරි කටයුතු කිරිමට පොලිස් කොස්තාපල් 61509 වික්රමසිංහ යන නිලධාරියාද ගොස් ඇති බව පොලිසිය කියයි.
පලාගොස් ඇති අනිත් සැකකරුවන් දෙදෙනාද අවුරුදු 27 හා 29 යන වයසේ පසුවන ගල්කන්ද සිංහපුර ප්රදේශයේ පදිංචිකරුවන් බව ඒ පිළිබඳ පරීක්ෂණ සිදුකරන වැලිකන්ද පොලිසිය පවසයි.
මෙම සිද්ධියේදී පලාගිය සැකකරුවන් දෙදෙනා අත්අඩංගුවට ගැනීම සඳහා විශේෂ මෙහෙයුමක් ආරම්භ කර ඇති බව පොළොන්නරුව ජ්යෙෂ්ඨ පොලිස් අධිකාරී බුද්ධික මනතුංග අප කළ විමසීමකදී සඳහන් කළේය.
මෙම සිද්ධිය සම්බන්ධ අධිකරණයට කරුණු වාර්තා කිරීමට කටයුතු කර ඇති බවත්, අධිකරණය ලබාදෙන නියෝගය අනුව ඉදිරියේදී මේ සම්බන්ධ කටයුතු කරන බවද ජ්යෙෂ්ඨ පොලිස් අධිකාරීවරයා වැඩිදුරටත් පැවසීය.
මියගිය මෙම සැකකරුට විරුද්ධව මත්ද්රව්ය හා ගංජා ළඟ තබා ගැනීම සම්බන්ධව හා රුපියල් 70,000 ක් වටිනා එල ගවයින් සිව්දෙනකු සොරකම් කර අලෙවි කිරීම ඇතුළු නඩු කිහිපයකටද, මත්ද්රව්ය අපරාධ සහ චෝදනා 10 කට වරෙන්තු ලබා ඇති බවද පොලිසිය පවසයි.
පොළොන්නරුව ජ්යෙෂ්ඨ පොලිස් අධිකාරී බුද්ධික මනතුංගගේ මෙහෙයවීමෙන් වැලිකන්ද පොලිස් ස්ථානාධිපති පොලිස් පරීක්ෂක එල්.පී.ජේ. කුමාරසිංහ ඇතුළු පොලිස් නිලධාරි කණ්ඩායමක් මෙම වැඩිදුර පරීක්ෂණ සිදුකරයි.
