ශ්රියානි විජේසිංහ –
වරප්රසාදවලට ඇති ආසාව හේතුවෙන් පුරප්පාඩු පිරවීමට ඇතැම් නිලධාරීන් දක්වන මැලිකම මත සෞඛ්ය අමාත්යංශයේ සහ ජාතික රෝහල් තුනේම ඉහළ තනතුරු හිස්වී පරිපාලන කටයුතු අවුල් සහගත තත්ත්වයකට පත්ව ඇතැයි වාර්තාවේ.
නියෝජ්ය අධ්යක්ෂ ජනරාල් තනතුරු ලෙස පවතින වෛද්ය සේවා, වෛද්ය සැපයුම්, අධ්යාපන පුහුණු හා පර්යේෂණ, දන්ත වෛද්ය සේවා, රසායනාගාර සේවා තනතුරු සහ ඖෂධ නියාමන අධිකාරියේ ප්රධාන විධායක නිලධාරී තනතුර, රිජ්වේ ආර්යා ළමා රෝහලේ අධ්යක්ෂ තනතුර, කොළඹ ජාතික රෝහලේ නියෝජ්ය අධ්යක්ෂක ජනරාල් තනතුර, ගාල්ල ජාතික රෝහලේ සහ මහනුවර ජාතික රෝහලේ අධ්යක්ෂක තනතුරු මේ වන විටත් පුරප්පාඩු වී ඇති අතර එම කිසිදු තනතුරකට ස්ථිර පත්වීමක් මේ වන තෙක් සිදුකර නොමැති බව සෞඛ්ය අංශ අනාවරණය කරයි.
වැඩ ආවරණය කිරීම පදනම යටතේ වෙනත් ආයතනවල සේවය කරන නිලධාරීන්ට මෙම ආයතනවල රාජකාරිය ආවරණය කිරීමට භාරදී ඇති බැවින් එම නිලධාරීන් සේවය කරන ආයතන හෝ වැඩ ආවරණය කරන ආයතන හෝ කිසිවක හෝ කටයුතු නිසි පරිදි සිදු කර ගැනීමට අපහසු වී ඇත.
ස්ථිර පත්වීම් නොමැති වීම හේතුවෙන් දැනට වැඩ බලන නිලධාරීන් තීන්දු තීරණ ගැනීමේදී ඒ සඳහා මැලිකමක් දක්වන අතර ඇතැම් නිලධාරීන්ට ආයතන කීපයක වැඩ ආවරණය කිරීමට සිදුවීම හේතුවෙන් එම නිලධාරීන්ද අපහසුතාවයට පත් වී ඇති බව වාර්තා වේ.
පවතින තත්ත්වය හමුවේ ඖෂධ මිලදී ගැනීම් සහ බෙදා හැරීම , රසායනාගාර සේවාව සම්බන්ධයෙන් තීරණ ගැනීම, දන්ත වෛද්ය සේවාව සම්බන්ධයෙන් තීරණ ගැනීම කාර්යක්ෂම විය යුතු නමුත් එම ආයතන මන්දගාමී තත්ත්වයකට පත්ව ඇත.
එසේම ලංකාව තුළ පවතින ප්රධාන පෙළේ රෝහල්වල ඇතිවී තිබෙන මෙම පුරප්පාඩු හේතුවෙන් එම රෝහල් කටයුතු ඉතාමත් මන්දගාමී තත්ත්වයට පත්ව ඇති අතර තවදුරටත් මෙම තත්ත්වය පැවතිය හොත් සෞඛ්ය පද්ධතිය කඩා වැටීමේ බරපතල තත්ත්වයකට මුහුණ දෙනු ඇතැයි සෞඛ්ය වෘත්තිකයෝ පෙන්වා දෙති.
දැනට පුරප්පාඩු වී ඇති තනතුරු වලට අමතරව මෙම වසර අවසානය වන විට සෞඛ්ය අමාත්යාංශයේ අතිරේක ලේකම් තනතුරු 2ක් සහ නියෝජ්යාඅධ්යක්ෂ ජනරාල් තනතුරු 4 ක් පුරප්පාඩු වීමට නියමිත බවට ද තොරතුරු වාර්තා වේ
කෙසේ නමුත් . මෙම තනතුරුවලට ස්ථිර නිලධාරීන් පත්කිරීම ප්රමාද කිරීම පිටුපස සෞඛ්ය අමාත්යාංශයේම ඉහල තනතුරු දරණ නිලධාරීන් සිටින බවත් ඇතැම් නිලධාරීන් තනතුරුවල වැඩ ආවරණය කරමින් එම තනතුරු වලින් ලැබෙන දීමනා සහ වරප්රසාද ලබා ගන්නා බැවින් ඔවුන් මෙම පුරප්පාඩු පිරවීම කඩිනම් නොකිරීමට හේතු වී ඇති බවත් සෞඛ්ය අමාත්යංශ අභ්යන්තර ආරංචි මාර්ග පවසයි.
