මනම්පිටිය නිමල් ජයරත්න –
මඩකලපුව වාකරේ මුහුදු තීරයේ අක්කර එකොළොස්දාහකින් යුත් කඩොලාන භූමියක් ඉස්සන් වගාවක් සඳහා පෞද්ගලික සමාගම් අටකට ලබාදීමෙන් තමන්ට සිදුවන හානියට එරෙහිව වාකරේ පාරම්පරික සිංහල දමිළ ධීවර පවුල් 06 වෙනිදා කදිරවේලි තැපැල් කාර්යාල ඉදිරිපිට විරෝධතාවයක නිරත වූහ.
ප්රදේශයේ වටිනා කඩොලාන භූමියක් සමාගම් අටකට ඉස්සන් වගාවකට ලබාදීමෙන්, වාකරේ ධීවර පවුල් 3500 කට සහ කිරි ගොවීන් 4000 කටත්, පරිසරයටත් දැඩි බලපෑමක් එල්ල වන බවද විරෝධතාකරුවෝ මෙහිදී සඳහන් කළහ.
වාකරේ උප්පුවේලී ප්රදේශයේ පිහිටා ඇත්තේ ඉතා දුර්ලභ ගණයේ කඩොලාන පද්ධතියක් බවත්, එහි සමාගම් අටකට ඉස්සන් වගාවකට ලබාදීමෙන් ජන ජීවිතයට පරිසර පද්ධතියට සිදුවන ව්යසනය බරපතල බවත් පරිසර යුක්ති කේන්ද්රයේ සභාපති හේමන්ත විතානගේ පෙන්වා දුන්නේය.
ඒ සමගම වාකරේ මුහුදු තිරයේ කිලෝමීටර් 40 ක් දුරට හා මීටර් 30 පළලට ඉල්මනයිට් ලබාගැනීම සඳහා 2012 වර්ෂයේදී රජය මගින් සමාගමකට ලබාදීමෙන් පසු ජන ජීවිතයට සිදුවන ව්යසනය හේතුවෙන් අතර මග නවතා දැමූ ව්යාපෘතියක් වසර දොළහකින් පසුව යළිත් ක්රියාත්මක කිරීමට සැලසුම් කර ඇති බව ප්රදේශවාසීහු කීහ.
මේ පිළිබඳව කළ විමසුමක දී පරිසර යුක්ති යුක්ත කේන්ද්රයේ සභාපති හේමන්ත විතානගේ පැවසුවේය 2012 නිකුත් කර ඇති පරිසර වාර්තාවකට අනුව වාකරේ මුහුදු තිරයේ ඉල්මනයිට් හැරීමට අවසර ලබාදී ඇති බවය.
සාමාන්යයෙන් පරිසර වාර්තාවක් වලංගු වන්නේ වසර තුනක කාලයක් සඳහා පමණක් බවත්, පරිසර වාර්තාවක් දිගු කළ හැක්කේ අවස්ථා දෙකකදී වුවද වසර දොළහකින් පසු කිසිදු මූලික පරිසර විශ්ලේෂණයක් නොමැතිව සිදු කරන ව්යාපෘතිය නීති විරෝධී බවත් ඔහු පැවසුවේය.
මෙම ව්යාපෘති මගින් පාරම්පරික ධීවරයන් තුන්දහස් පන්සියයකට තම ජීවන මං ඇහිරී . මුහුදු කාදනයට ලක්ව විශාල පරිසර හානියක් සිදුවන බව වාකරේ ධීවර පවුල් වෙනුවෙන් විරෝධතා අවස්ථාවට සහභාගි වූ පරිසර යුක්ති කේන්ද්රයේ සභාපති හේමන්ත විතානගේ පෙන්වා දුන්නේය.
ඔහු පෙන්වා දෙන්නේ වාකරේ මුහුදු තීරයේ ඉල්මනයිට් හෑරීම සඳහා පෞද්ගලික සමාගමට අවසර ලබාදීමෙන් රජයට ලාභයක් නොලැබෙන බවය.
ඉදිරියේදී, පළාත් ආණ්ඩුකාර සෙන්දීල් තොණ්ඩමන්ගේ සහයෝගය ඇතිව මුතුර් සිට කින්ණියා දක්වාත්, නිලාවේලි සිට කුඹුරුපිටිය දක්වාත්, මීටර් 300 ක් පළලට මුහුදු තිරයේ ඛනිජවැලි හෑරීමට පෞද්ගලික සමාගමක් විසින් අවසර ලබා ගැනීමට කටයුතු කරමින් සිටින බව ද හේමන්ත විතානගේ හෙළි කළේය.
මෙමගින් නැගෙනහිර මුහුදු තිරය දැඩි ව්යසනයකට ලක් වීමේ අවදානමක් පවතින බවද ඔහු පෙන්වා දුන්නේය.
වාකරේ සිංහල, දමිළ, පාරම්පරික ධීවරයන්ගේ අයිතිය වෙනුවෙනුත් පාරම්පරික කිරි ගොවීන්ගේ අයිතිය වෙනුවෙන් මෙන්ම
මුහුදු තිරයට සිදුවීමට යන හානිය වළකා ගැනීමටත්, උප්පුවේලී ප්රදේශයේ පිහිටා තිබෙන කඩොලාන පද්ධතිය බේරාගැනීම වෙනුවෙන් පරිසර යුක්ති කේන්ද්රයක් ලෙස අදාළ පෞද්ගලික සමාගම්වලට එරෙහිව නඩු පැවරීමට පියවර ගන්නා බවද ප රිසරය යුක්ති කේන්ද්රයේ සභාපති හේමන්ත විතානගේ මහතා මෙහිදී වැඩිදුරටත් කිව්වේය.
අප මෙම විරෝධතාකරුවන් නගන චෝදනා පිළිබඳ වාකරේ ප්රාදේශීය ලේකම් ජී. අරුණන්ගෙන් දුරකථනයෙන් කළ විමසීමකදී සඳහන් කළේ වාකරේ මුහුදු තීරය සහ උප්පුවේලී කඩොලාන පරිසර පද්ධතිය පෞද්ගලික සමාගම්වලට ලබාදීමට සැලසුම් සකස් කර ඇති බවත්, ඒ සඳහා තමන්ට මැදිහත්වීමට නොහැකි තත්ත්වයක් පවතින බවයි.
