වැඩිවුන විදුලි බිලයට විරෝධය පල කිරිම සඳහා අදට යෙදෙන වප් පොහොයේ දී දිවයින පුරා පිහිටි විහාරස්ථානවල සිදු කෙරෙන ආගමික වතාවත් විදුලි ආලෝකය දැල්වීමෙන් තොරව සිදු කිරීමට බොහෝ විහාරාධිපති හිමිවරුන් ගත් තීරණය විදුලි බිල අඩුකිරීමට මහජන උපයෝගීතා කොමිසම විසින් හදිසියේ ගත් තීරණය මත වෙනස් නොවන ලකුණු පහළ වී තිබේ.
පූජ්ය ඕමල්පේ සෝභිත හිමියන් ඇඹිලිපිටියේ දී ඊයේ මාධ්ය හමුවක් කැඳවමින් අද රාත්රි කාලයේදී විහාරස්ථානවල විදුලි පහන් නිවා වැඩි වූ විදුලි බිලට විරෝධය පළ කරන ලෙස ඉල්ලා සිටියහ.
සංඝයාවහන්සේගේ මේ විරෝධතා ප්රකාශය රටේ ජනතාවගේ දරිද්රතාවයේ ද සහ පීඩනයේ ද ප්රකාශනයක් වන බැවින් අති උතුම් මැලකම් කාදිනල් රන්ජිත් හිමිපාණන්ගේ උපදෙස් මත කොළඹ අගරදගුරු පදවියේ සියලු දේවස්ථානවල අද සවස 6 සිට රාත්රී 10 තෙක් විදුලි ආලෝකය නොදැල්වීමට තීරණය කළ බව ඊයේ සවස මාධ්ය හමුවක් කැඳවා සිරිල් ගාමිණී පියතුමෝ පැවසූහ.
කෙසේ වෙතත්, වැඩි වූ විදුලි බිලට සහනයක් ලෙස ආගමික ස්ථාන, පූණ්යායතන කාණ්ඩයෙන් ඉවත් කර පොදු කාර්ය යටතට ගැනීමට තීරණය කර ඇති බව මහජන උපයෝගීතා කොමිසමේ සභාපති ජනක රත්නායක ඊයේ ප්රකාශ කළේය..
ඒ අනුව ඉහළ නැංවූ ආගමික ස්ථානවල විදුලි ගාස්තුව ඊට සාපේක්ෂව 50% කින් පමණ පහත දැමීමටයි තීරණය වී ඇති ඒ අනුව පුණ්ය ආයතන කාණ්ඩයේ රුපියල් 65 ක්ව පැවති විදුලි ඒකකයක ගාස්තුව, පොදු කාර්ය කාණ්ඩය යටතට ගැනීමේදී ඒකකයකට අය කෙරෙන්නේ රුපියල් 32 ක් පමණක් බවත් දන්වා සිටියේය.
ආගමික ස්ථානවල විදුලි බිල්පත් ගැටලුවට සහන සැලසීම සම්බන්ධයෙන් දැනුවත් කිරීම සඳහා මහජන උපයෝගීතා කොමිෂන් සභාවේ සභාපති ජනක රත්නායක ඊයේ මල්වතු – අස්ගිරි මහනාහිමිවරුන් ද බැහැදුටුවේය.
