මනම්පිටිය නිමල් ජයරත්න –
වැලිකන්ද මහවැව ගම්මානයට ඊයේ (29) රාත්රි කරපොළ රක්ෂිතයෙන් කඩා වැදුණු වන අලි රංචුවක් ගම්මානයේ නිවාස පහක් කඩාබිඳ දමා ඇති අතර වන අලි ප්රහාරය නිසා විනාශ වූ නිවසක බිත්තියකට යට වීමෙන් කාන්තාවක් තුවාල ලබා වැලිකන්ද රෝහලට ඇතුළත් කර තිබේ.
නිවෙස්වල තිබූ වී උර රාශියක් ද මෙම වන අලි රංචුව විසින් විනාශ කර ඇත. .
මනම්පිටියේ සිට කරපොළ දක්වා දිවෙන විදුලි වැට අක්රීය වීම හේතුවෙන් කරපොල රක්ෂිතයේ සිට තම ගම්මානයට නිරන්තරව වන අලි ඇදෙන බවත්, යම් මිනිස් ඝාතනයක් සිදුවීමට පෙර මෙම අලි වැට සක්රීය කරදෙන ලෙසත් මහවැව ගම්වාසීහු අදාළ බලධාරීන් ඉල්ලා සිටිති.
වන අලින් තම ගම්මානයේ නිවාස පහක් බිඳ දැමීමෙන් එම නිවාස වල තිබූ පාපැදි, ටීවී, ගුවන් විදුලි, ඇතුළු බඩු භාණ්ඩ රැසකට හානි සිදුව ඇති බවත්, මේ පිළිබඳව අදාල බලධාරීන්ට කොතෙක් දැනුවත් කළද අලි මිනිස් ගැටුමට මෙතෙක් විසඳුම් නොමැති බවත්, වන අලින්ගෙන් වගාවන් බේරා ගැනීමට නීති විරෝධී ලෙස විදුලි රැහැන් ඇදීම නිසා මේ වනවිට වන අලි දෙදෙනකු මියගොස්, මිනිස් ජීවිතයක්ද අහිමි වී ඇති බව ගම්වාසිහු කියති.
තව දුරටත් මහවැව ගම්මානයට අලි මිනිස් ගැටුම් වර්ධනය වීමට පෙර මනම්පිටියේ සිට කරපොල දක්වා දිවෙන විදුලි වැට ස්ථිරව ඉදිකරන ලෙසත්, තම ගම්මානයේ සිදුවූ දේපළ හානිවලට ඉතා කඩිනමින් වන්දි දීමට අදාළ බලධාරීන් අවධානය යොමු කරන ලෙසද මනම්පිටිය මහවැව ගම්වාසින් රජයෙන් ඉල්ලා සිටිති.
අප අලි මිනිස් ගැටුම වර්ධනය වීම පිළිබඳ සහ අක්රිය අලි වැට පිළිබඳව වැලිකන්ද වනජීවී කාර්යාලයෙන් දුරකථනයෙන් කළ විමසීමේදි, එහි නිලධාරියකු සඳහන් කළේ මනම්පිටියේ සිටි කරපොල දක්වා අලි වැට ආරක්ෂා කිරීමට සිවිල් ආරක්ෂක බලකාය යොදවා ඇති බවත්, ත්රිකෝණමඩුව ඇතුළු අවට ප්රදේශවල රක්ෂිත විනාශ කිරීම හේතුවෙන් එම ප්රදේශවල සිටින වන අලි ගම් වැදීම බහුලව සිදුවන බවය.
ඊට විසදුම් රජය මගින් ලබාදිය යුතු බවයි.
