කොළඹ නගරයේ ජනතාව බූස්ටර් එන්නත ලබා ගැනීමට මැලිකමක් දක්වමින් ඇත. දෙලක්ෂ පනස් දහසකට එන්නත් දීම අපේක්ෂා කළත් ඉන් පහෙන් එකක්වත් එන්නත්කරණයට පැමිණ නැත. ඔමික්රෝන් පිළිබඳ බරපතල අවදානමකට රට විවෘතව තිබෙද්දී, ඊට මුහුණ දීම සඳහා බූස්ටර් මාත්රාව ලබාගැනීමේ වැදගත්කම ලෝකයම පුන පුනා කියද්දී කොළඹ මිනිස්සු තෙවන මාත්රාව ප්රතික්ෂේප කරති. එසේ වන්නේ ඇයි?. කොළඹ මහ නගර සභාවේ ප්රධාන වෛද්ය නිලධාරී රුවන් විජේමුණිගෙන් ලංකසර කළ විමසුමකදී ඔහු ලබා දුන් පිලිතුරු පහත දැක්වේ.
ප්රශ්නය – කොළඹ නගරයේ බුස්ටර් එන්නත ලබා ගැනීමට ජනතාව දක්වන උනන්දුව කොයි වගේද?
පිළිතුර – ඇත්තෙන්ම අපි හිතුවට වඩා ජනතාවගේ උනන්දුව මන්දගාමීව තමයි සිදුවෙන්නේ.
ප්රශ්නය – මන්දගාමීව කියලා ඔබ අදහස් කළේ කුමක්ද?
පිළිතුර – කොළඹ නගරයේ වයස අවුරුදු 20ට වැඩි පුරවැසියන් දෙලක්ෂ පනස් දහසකට බූස්ටර් එන්නත ලබා දෙන්න අපි ඉලක්ක කළා. නමුත් මේ වන විට එන්නත ලබා ගෙන තියෙන්නේ 45000ක් වැනි පිරිසක් විතරයි.
ප්රශ්නය – බූස්ටර් එන්නත කියලා ලබා දෙන්නේ ෆයිසර් එන්නත. පසුගිය කාලයේදී කොළඹ නගරයේ වයස අවුරුදු 20 – 30 අතර තරුණ කණ්ඩායම් ෆයිසර් එන්නත ලබා දෙන්නම කියලා ඉල්ලීම් කලා. ඒත් දැන් බූස්ටර් එන්නත විදිහට ෆයිසර් එන්නත ලබා දීමේදීත් ඔවුන් එය ලබා ගැනීමට වැඩි කැමැත්තක් නොදක්වන්නේ ඇයි?
පිළිතුර – මම හිතන්නේ සමාජ මාධ්ය ඔස්සේ අසත්ය තොරතුරු තරුණ කණ්ඩායම් අතරට ගියා. මේ අසත්ය තොරතුරුවලට ඔවුන් රැවටීමක් වෙලා තියෙනවා. විශේෂයෙන්ම මේ එන්නත ලබා ගත්තාම ලිංගික අප්රාණික බව ඇතිවෙනවා කියන අසත්ය ප්රවෘත්තිය ඔවුන්ගේ සිත් තුළ තදින්ම කාවැදෙන්න ඇති.
ප්රශ්නය- ලෝකයේ බොහෝ රටවල් වල මේ වන විට ඔමික්රෝන් වයිසරය පැතිර යනවා. ලංකාවේදී ආසාදිතයනින් 4 දෙනෙකු හමුවුණා. මෙවැනි වටාපිටාවක් තුළ බූස්ටර් එන්නත ලබා නොගෙන සිටීම භයානක තත්ත්වයක් වෙයිද?
පිළිතුර – අපිට හමුවුණේ ආසාදිතයින් 4 දෙනා වුණාට සමාජයේ තවත් බොහෝ පිරිසක් අනිවාර්යයෙන්ම සිටිනවා ඇති. මේ වයිරසය ඉතාමත් සීග්රයෙන් පැතිර යනවා. බූස්ටර් එන්නත මගින් ආසාදිත වුණත් මරණ සංඛ්යාවේ යම් අඩුවක් දැකගන්න පුලුවන් වෙනවා. අපි ඒකයි කියන්නේ ජනතාවට බූස්ටර් එන්නත ලබා ගන්න කටයුතු කරන්න කියලා .
මරණ අඩු වුණත් ආසාදිතයින් හිතාගන්නවත් බැරි ලෙස වැඩිවෙනවා කියලා එංගලන්තයේ සෞඛ්ය ඇමතිනිය පවා ප්රකාශ කරලා තියෙනවා. අනික ඉදිරියට පැමිණෙන්නේ උත්සව සමය. මේ කාලයේදී අපේ ජනතාව සාප්පු සවාරි යනවා. විවිධ උත්සව ප්රසංග සංවිධානය කරනවා. ඒ නිසා බූස්ටර් එන්න ලබා ගැනීම ඉතාමත් වැදගත් කියලයි මම කියන්නේ.
ප්රශ්නය – ඔබ පැවසූ පරිදි සමාජයේ මේ වන විට ඔමික්රෝන් ආසාදිතයින් විශාල සංඛ්යාවක් සිටිය හැකි නම් ඇයි සෞඛ්ය නීති රීති ලිහිල් කිරිමට සෞඛ්ය බලධාරින් කටයුතු කළේ?.
පිළිතුර – සෞඛ්ය පමණක් නොවේයි, අපි අපේ රටේ ආර්ථික ගැනත් හිතන්න අවශ්යයයි. මේ වන විට රටේ ආර්ථිකය හොඳටම කඩාගෙන වැටිලා. මම හොදින්ම දන්න කාරනයක් තමයි කොළඹ නගරයේ හෝටල් වල , පෞද්ගලික වෛද්ය මධ්යස්ථානවල සේවය කළ තරුණ තරුණියන්ට අද රැකියාව අහිමිවෙලා තියෙනවා. ඒ අය බුරුතු පිටින් විදේශ ගත වෙනවා. සංචාරකයින් අපේ රටට එනවිට ඔවුන්ට සේවය සපයන්න අපේ රටේ පුහුණු තරුණ කොටස් නැතිවෙනවා.
අපිට විශාල ගැටලුවකට මෙහිදී මුහුණපාන්න වෙනවා. මෙහිදී ජනතාව දැන ගත යුතු කාරණය තමයි සෞඛ්ය මාර්ගෝපදේශයන්ට අනුකූලව කටයුතු කරන ගමන්ම බූස්ටර් මාත්රාවත් අරගෙන ආරක්ෂා වෙන්න. මෙහෙම සෑම කෙනෙක්ම ආරක්ෂා වෙනවා නම් රෝගය පැතිරෙන්න ඉඩක් නැහැ.
ප්රශ්නය – එන්නත් මාත්රා දෙකම ලබා ගත් පුද්ගලයෙකුට කොවිඩ් වයිරසය ආසාදනය වුවහොත් බූස්ටර් එන්නත ලබා ගන්න කොතරම් දිනක් බලා සිටිය යුතුද?
පිළිතුර – අනිවාර්යයෙන්ම මාස 6ක් ගත විය යුතුයි. මොකද රෝග ලක්ෂණ පෙන්වමින් රෝගය සෑදුණේ නම් එවැනි පුද්ගලයෙකුගේ සිරුරේ කොවිඩ් වයිරසයට එරෙහිව ප්රතිදේහ නිපදවෙනවා. ඒ ප්රතිදේහ හීන වෙන්න අවම වශයෙන් මාස 6ක කාලයක් වත් ගතවෙනවා. හීන වෙන කාලය ට අනුව බූස්ටර් එන්නත ලබා දුන්නාම නැවත සිරුරේ ප්රතිදේහ ගොඩනැගෙනවා.
ප්රශ්නය – කොළඹ නගරයේ බූස්ටර් එන්නත ලබාදෙන දින වකවානු වෙන්කර තිබෙනවාද?
පිළිතුර – මේ මාසය අවසන් වෙන තෙක් දිපතා ස්ථාන 6ක අපි බූස්ටර් එන්නත ලබා දීමට කටයුතු කරනවා.
