නඩු විභාගය නවත්වා බහා තබා ඇති අපරාධ විමර්ශනයක්වන ලලිත් – කූගන් පැහැරගෙන ගොස් අතුරුදහන් කිරීම පිළිබඳ සිද්ධිය යළි විමර්ශනය කිරීම අරඹා ඇති බව මහජන ආරක්ෂක සහ පාර්ලිමේන්තු කටයුතු පිළිබඳ ඇමති ආනන්ද විජේපාල අද (08) පාර්ලිමේන්තුවට පැවසුවේය.
තවද උතුරු නැගෙනහිර සිවිල් යුදමය තත්ත්වයන් අවසන් වූ පසු අතුරුදහන් වූ සිදුවීම් 04ක් සම්බන්ධව අපරාධ පරීක්ෂණ දෙපාරත්මේන්තුව විසින් ද, සිදුවීම් 06ක් සම්බන්ධව කොළඹ අපරාධ කොට්ඨාසය විසින් ද විමර්ශන සිදුකරනු ලබන බව ඇමතිවරයා වැඩිදුරටත් අනාවරණය කළේය.
ලලිත් කුමාර් විරාජ් සහ කුගන් මුරුගානන්දන්ගේ අතුරුදහන්වීම සිදුවන්නේ 2011.12.09 වැනි දිනය. ඒ සම්බන්ධයෙන් මල්ලාකම් මහේස්ත්රාත් අධිකරණයේ නඩු අංක බී 669/ 2011 යටතේ 2011/12/12 දින ගරු අධිකරණයට කරුණු වාර්තා කර තිබිණි. මෙම නඩුවට අදාලව අවස්ථා 17ක දී පොලිස් ස්ථානාධිපති අච්චුවේලි විසින් වැඩිදුර වාර්තා ඉදිරිපත් කර ඇති බවත් අවසන් වරට මෙම නඩුව 2014 /10/10 දින ගරු අධිකරණයේ දී කැඳවූ අවස්ථාවේ දී නඩුව බහා තැබීමට අධිකරණය නියෝග කර ඇති බවත් මහ ජන ආරක්ෂක ඇමතිවරයා අද පාර්ලිමේන්තුවේ දී කීවේය.
සිද්ධිය සම්බන්ධව සිදුකළ පසුගිය විමර්ශනවලින් ප්රගතියක් අත්පත් කරගෙන නොමැතිවීම හේතුවෙන් වැඩබලන පොලිස්පතිවරයා විසින් මේ සම්බන්ධව විමර්ශන කටයුතු කිරීම සඳහා 2025/06/03 දින අපරාධ පරීක්ෂණ දෙපාර්තමේන්තුවට අවශ්ය නියෝග සහ උපදෙස් ලබා දී ඇතැයි ඇමතිවරයා ප්රකාශ කළේය.
ඔහු පාර්ලිමේන්තුවට කීවේ ජ්යෙෂ්ඨ නියෝජ්ය පොලිස්පති අපරාධ පරීක්ෂණ සහ මූල්ය අපරාධ විමර්ශන විසින් 2025/06/03 දිනැතිව ජ්යෙෂ්ඨ නියෝජ්ය පොලිස්පති උතුරු පළාත වෙත ලිපියක් යොමු කරමින් මෙම විමර්ශනයට අදාලව අච්චුවේලි පොලිස් ස්ථානය යාපනයේ පරාධ ස්ථාන පරීක්ෂණාගාරය හා යාපනයේ කොට්ඨාස අපරාධ විමර්ශන අංශයන්ට සිදුකළ විමර්ශනයන්ට අදාලව සියලු විමර්ශන සහ උදෘත ගොනු ඉදිරිපත් කරන ලෙසට දැනුම් දී තිබෙන බවය.
ඒ අනුව 2025/06/11 දින මෙම උදෘත ගොනු අපරාධ පරීක්ෂණ දෙපාර්තමේන්තුවට යොමු කර ඇත. ඇමතිවරයාට අනුව මේ සම්බන්ධව අපරාධ පරීක්ෂණ දෙපාර්තමේන්තුවේ මනුෂ්ය ඝාතන සහ සංවිධානාත්මක අපරාධ විමර්ශන අංශය විසින් මේ වනවිට විමර්ශන කටයුතු ආරම්භ කර පවත්වාගෙන යනු ලබයි.
