දිනසේන රතුගමගේ –
ශ්රී ලංකාවේ අධිකරණ නියෝගවලට එරෙහිව උපවාසයක නිරතව සිටි රාමේස්වරන් ධීවරයින්ගේ ප්රශ්නයට කිසිදු ඉන්දීය බලධාරියෙකු මැදිහත් නොවීම නිසා ඔවුන් සිය උපවාසය අතහැර දමා ඊයේ (28) යළිත් සුපුරුදු පරිදි ධීවර කටයුතු ආරම්භ කොට තිබේ.
ඊට පෙර මෙම ධීවරයින් දින හයක් පුරා විරෝධතාවයක නිරත වූ අතර එම කාලය තුළ ඔවුන් මසුන් මැරීමට යාමෙන් වැළකී සිටියහ.
අනතුරුව දිනකට ධීවරයින් 300 කගේ සහභාගිත්වයෙන් උපවාසයක් ආරම්භ කළ අතර එම උපවාසය මගින් ඔවුන් ඉල්ලා සිටියේ යාපනය බන්ධනාගාරයේ රඳවා සිටින ඉන්දීය ධීවරයින් නිදහස් කරන ලෙසය.
රාමේස්වරන් තංගච්චිමඩම් වලසායි බස් නැවතුම්පොළේ බිම වාඩි වී සිදු කරන ලද මෙම උපවාසයේදී දැනට යාපනය බන්ධනාගාරයේ රඳවා සිටින ඉන්දීය ධීවරයින් 43 දෙනා වහාම නිදහස් කරන ලෙසත් ලබන සතියේදී ඉන්දියාවේ තූත්තුකුඩියට පැමිණීමට නියමිත ඉන්දීය අග්රාමාත්ය නරේද්රසිං මෝදි හමුවී මේ ප්රශ්නය සාකච්ඡා කිරීමට රාමේස්වරන් ධීවර සංගමයට අවස්ථාවක් සලසා දෙන ලෙසත් ඉල්ලා සිටියහ.
ශ්රී ලංකාවේ අධිකරණවලින් ඉන්දීය ධීවරයින්ට එරෙහිව දඬුවම් පැමිණවීමේදී එක් එක් අධිකරණය විසින් එකිනෙකට පටහැනි ක්රමවේද අනුගමනය කරන නිසා මේ ප්රශ්නයට ඉන්දීය අග්රාමාත්යවරයා මැදිහත් වියයුතු බවට තම ධීවර සංගම් අග්රාමාත්යවරයාගෙන් ඉල්ලා සිටීමට ඔහු හමු විය යුතු බවට රාමේස්වරන් ධීවරයෝ ඉල්ලීමක් කොට තිබුණහ.
ඔවුන්ගේ ඉල්ලීම් කිසිවකට ඉන්දීය බලධාරීන්ගෙන් ප්රතිචාර නොලැබුණු තැන ඔවුන් සිය උපවාසය අතහැර දමා ඇත.
