හිටපු ජනාධිපති මෛත්රීපාල සිරිසේනගෙන් අපරාධ පරීක්ෂණ දෙපාර්තමේන්තුව ඊයේ (18) සවස පැය තුනකට ආසන්න කාලයක් පුරා ප්රකාශයක් සටහන් කරගෙන තිබේ.
රෝයල් පාර්ක් ඝාතන සිද්ධියේ මරණ දණ්ඩනයට ලක් වී සිටි අපරාධකරු වූ ජූඩ් ශ්රමන්ත ජයමහ නැමැත්තාට ජනාධිපති පොදු සමාව ලබාදීමේ දී සිදුවු අල්ලස් ගැනීමක් සම්බන්ධව කෙරෙන විමර්ශනයක් යටතේ මෙම ප්රශ්න කිරීම සිදුකර ඇත.
හිටපු ජනාධිපතිවරයා පදිංචිවී සිටින බෞද්ධාලෝක මාවතේ නිවසට ගිය අපරාධ පරීක්ෂණ දෙපාර්තමේන්තුවේ නිලධාරීන් පිරිසක් මෙම ප්රකාශය ලබාගෙන නීතිපතිවරයා වෙත යොමු කරනු ඇතැයි වාර්තා වේ.
මෙම අල්ලස් ගැනීම සම්බන්ධව පරීක්ෂණය සිදුවන්නේ හිටපු ජනාධිපතිවරයා සහ අතුරලියේ රතන හිමියන් විසින් සිදුකළ පැමිණිලි දෙකක් පදනම් කරගනිමිනි.
රෝයල් පාර්ක් ඝාතකයාට ජනාධිපති සමාව ලබා දීම සඳහා හිටපු ජනාධිපති මෛත්රීපාල සිරිසේන විශාල අල්ලස් මුදලක් ලබා ගත් බවට සමාජයේ ඇති වී තිබෙන කතාව සම්බන්ධව රූපවාහිනී සාකච්ඡාවකදී කළ විමසීමට හිටපු ජනාධිපතිවරයා කීවේ මෙම සමාව ලබා දීම අතුරලියේ රතන හිමියන්ගේ දැඩි අවශ්යතාවය මත සිදුවන බවය.
හිටපු ජනාධිපතිවරයා කීවේ මේ නිදහස් කිරීමෙන් පසු තමන් ද සම්බන්ධ කරගෙන අල්ලස් ගැනීමක් ගැන කතාබහක් ඇති වූ නිසා බුද්ධි අංශ යොදවා සොයා බැලූ බවත්, ඉන් හෙළිදරව් වුනේ නිදහස ලැබීමෙන් පසු ජූඩ් ශ්රමන්තගේ පවුලේ උදවියගෙන් විශාල මුදලක් යම් පිරිසකට ලැබී ඇති බවත්ය. මේ සිද්ධියට තමන්ගේ කිසිදු සම්බන්ධයක් නැති බව හිටපු ජනාධිපතිවරයා කීවේය.
මෙම ප්රකාශයෙන් පසු අතුරලියේ රතන හිමියන් අපරාධ පරීක්ෂණ දෙපාර්තමේන්තුවට ගොස් හිටපු ජනාධිපතිවරයාගේ ප්රකාශය සම්බන්ධව පැමිණිල්ලක් සටහන් කළේය. දැන් ඒ ඔස්සේ විමර්ශන ඇරඹී තිබේ.
රාජගිරිය රෝයල් පාර්ක් සුපිරි නිවාස සංකීර්ණයේ පියගැටපෙළ මතදී 2005 වසරේ ජූනි 30 වන දා 19 හැවිරිදි ඉවෝන් ජොන්සන් නමැති තරුණිය ගෙළ සිර කර හිස පොළොවේ ගසා ඝාතනය කිරීමේ චෝදනාව මත ඇගේ පෙම්වතා වූ ජූඩ් ශ්රමන්තට දීර්ඝ නඩු විභාගයකින් පසු වර්ෂ 2012 දී කොළඹ මහාධිකරණය විසින් දොළොස් වසරක සිර දඬුවමක් නියම කෙරිනි. .
පසුව පැමිණිලිකරුවන් ඉදිරිපත් කළ අභියාචනයෙන් පසු අභියාචනාධිකරණය ඔහුට මරණ දඬුවම ලබා දුන්නේය.
අනතුරුව විත්තිකරුවන් ශ්රේෂ්ඨාධිකරණයට ඉදිරිපත් කරන ලද අභියාචනය ප්රතික්ෂේප කර ඔහුට ලබා දුන් මරණ දඬුවම ස්ථිර කෙරිණි.
එම වරදකරු ජනාධිපති පොදු සමාව ලැබ නිදහස් විය.
