රාගම වෛද්ය පීඨයේ නේවාසිකාගාරයට කඩාවැදී වෛද්ය සිසුන්ට පහරදීම මෙහෙයවා ඇත්තේ රාජ්ය අමාත්ය අරුන්දික ප්රනාන්දුගේ 23 හැවරදි පුත් අවින්ද රන්දිල ජෙහාන් බව පොලිස් විමර්ශනවලින් තහවුරු වී ඇත.
සිය පියාගේ ආධාරකරුවන් පිරිසක් රැගෙන රාගමට පැමිණ මෙම පහරදීම සිදුවන විට බී.එම්.ඩබ්. මෝටර් රථයේ සිටිමින් පහරදීම මෙහෙයවා ඇත්තේ ඔහු විසින් බවද අනාවරණය වී තිබේ.
අත්අඩංගුවටගත් සැකකරුවන් ඒ බව පොලීසියට පවසා ඇත. ඒ අනුව රාජ්ය අමාත්ය අරුන්දිකගේ පුතා අත්අඩංගුවට ගැනීමට පොලීසිය පියවර ගෙන ඇත. එහිදී අමාත්යවරයාගේ පුතා සැඟවී පොලිස් අත්අඩංගුවෙන් බේරීමට දේශපාලන හයිය යොදා ඇතත් ඉහළම දේශපාලන අධිකාරියෙන් පොලීසියට ලැබී තිබෙන උපදෙස් අනුව ඔහුට පොලීසියෙන් බේරීමට ඉඩක් ලැබී නැත. ඒ අනුව රාජ්ය අමාත්යවරයාගේ පුතා නීතීඥ සහය ඇතිව පොලීසියට භාරවූ බව උසස් පොලිස් නිලධාරියෙක් සඳහන් කළේය.
දැනට අත්අඩංගුවට ගත් සැකකරුවන් අතර අරුන්දික ප්රනාන්දු රාජ්ය අමාත්යවරයාගේ විෂය පතයට අයත් රාජ්ය ආයතන දෙකක සේවකයින් දෙදෙනෙක් සිටී. ඔවුන් දෙදෙනාම අමාත්යවරයාගේ සමීපතම ආධාරකරුවන් බව පොලීසිය හදුනාගෙන ඇත. එසේම අත්අඩංගුවට ගැනීමටද අමාත්යවරයාගේ සමීප ආධාරකරුවන් කිහිප දෙනෙක් සිටින බව සඳහන්ය.
මේ තත්ත්වය මත අරුන්දික ප්රනාන්දු මහතාට සිය රාජ්ය අමාත්යධූරයෙන් ඉල්ලා අස්වීමට සිදුවනු ඇති බව දේශපාලන ආරංචි මාර්ග සදහන් කළේය. මේ වන විටත් අදාල සිදුවීම සම්බන්ධයෙන් පොලීසියෙන් වාර්තාවක් ඉහළම දේශපාලන අධිකාරියට යොමුවී තිබීම ඒ තත්ත්වයට හේතුවී ඇත.
