භාෂිකා හීන්දෙණිය –
ශ්රී ලංකා වෛද්ය සභාව විසින් කොළඹ අධිකරණ වෛද්ය කාර්යාලයේ විශේෂඥ අධිකරණ වෛද්ය නිලධාරී රුහුල්කගේ සේවය අට මාසයක් සඳහා අත්හිටුවා තිබෙද්දී එම අත්හිටුවීම නොතකා පසුගිය මාස හය තුළ වැදගත් පශ්චාත් මරණ පරීක්ෂණ දෙකක් සිදු කර තිබීම සම්බන්ධව බරපතල ආන්දෝලනයක් මතු වී තිබේ.
එම අත්හිටුවීම පසුගිය දෙසැම්බර් මස 20 වැනිදා ප්රකාශ වුන අතර අත්හිටුවීම අගෝස්තු 20 දක්වා ක්රියාත්මකය.
එසේ තිබිය දී ඔහු විසින් බොරැල්ල රිජ්වේ ආර්යා ළමා රෝහලේ කුඩා දරුවකුගේ රෝගී වකුගඩුව සමග නිරෝගී වකුගඩුව ද ඉවත් කිරීමෙන් පසුව සිදුවූ ආන්දෝලනාත්මක මරණය සම්බන්ධව ද අධිකරණ වෛද්ය පරීක්ෂණය සිදුකර තිබිණි.
බොරැල්ල රිජ්වේ ආර්යා ළමා රෝහලේ දී මියගිය හම්දි ෆස්ලින් නමැති එම තුන් හැවිරිදි දරුවා ගේ උක්ත මරණ පරීක්ෂණය මෙන් ම ප්රකට ව්යාපාර නායක දිනේෂ් ෂාෆ්ටර්ගේ අබිරහස් මරණය සම්බන්ධ අධිකරණ වෛද්ය පරීක්ෂණය ද සිදුකර තිබුනේ රුහුල් හක් විසිනි.
දිනේෂ් ෂාෆ්ටර්ගෙ අධිකරණ වෛද්ය පරීක්ෂණය අධිකරණය ඉදිරියේ දැඩි ලෙස ප්රශ්න කෙරුණු අතර ඒ සමගම මුළු පරීක්ෂණ ක්රියාවලියම වෙනස් කිරීමට අධිකරණයට සිදු විය.
උක්ත වකුගඩු රෝගී ළදරුවාගේ පශ්චාත් මරණ පරීක්ෂණය ද අධිකරණයේ දී ප්රශ්න කිරීමට ලක් වූ අතර කොළඹ අතිරේක මහේස්ත්රාත් රජින්ද්රා ජයසූරිය පෙරේදා (02) නියෝග කළේ එම අධිකරණ වෛද්ය වාර්තාව පදනම් කර නොගෙන ස්වාධීනව ඉදිරි පරීක්ෂණ කරගෙන යන ලෙසය.
-
ශ්රී ලංකා වෛද්ය සභාව කියන්නේ කුමක් ද?
ශ්රී ලංකා වෛද්ය සභාවේ වෙබ් අඩවිය ප්රකාරව ඔහු මේ වනවිට වෛද්ය වෘත්තියේ යෙදීමට කිසිදු අවසරයක් නැති පුද්ගලයෙකි. එම වෛද්ය සභාවේ වෘත්තීය ආචාරධර්ම කමිටුව විසින් ශ්රී ලංකා වෛද්ය ආඥා පනතේ ඇති බලතල ප්රකාරව ශ්රී ලංකා වෛද්ය සභාවේ ලියාපදිංචි අංක 15168 දරන වෛද්ය රුහුල් හක්ට පසුගිය 2022 වසරේ දෙසැම්බර් 20 වැන දා සිට මාස අටක කාලයක් දක්වා වෛද්ය වෘත්තිකයකු ලෙස කටයුතු කිරීම, එහි වැටුප් ඇතුළු වරප්රසාද භාවිත කිරීම අත්හිටුවා ඇත.
ඒ අනුව ඔහුගේ වැඩ තහනම ඉවත් වීමට නියමිතව ඇත්තේ 2023 වසරේ අගෝස්තු මස 20 වන දා ය.
මේ සම්බන්ධව කළ විමසීමක දී ශ්රී ලංකා වෛද්ය සභාවේ සභාපති මහාචාර්ය වජිර එච්.ඩබ්ලිව්. දිසානායක ඩේලි මිරර් වෙත පවසා ඇත්තේ අදාළ අධිකරණ වෛද්ය නිලධාරියාගේ වැඩ තහනම ඉවත් කර නොමැති බවත්, එම තහනම තවමත් ක්රියාත්මක වන බවත්ය.
-
සිදුවෙමින් ඇති දේ
ශ්රී ලංකා වෛද්ය සභාව රුහුල් හක් සම්බන්ධයෙන් ගත් විනයානුකූල පියවර පිළිබඳව සෞඛ්ය සේවා අධ්යක්ෂ ජනරාල්වරයාද දැනුවත් කර ඇත. එවැනි තහනමක් පවා තිබියදීත් කොළඹ අධිකරණ වෛද්ය නිලධාරි කාර්යාලයට සම්බන්ධව සේවය කළේ කෙසේ ද යන්න පිළිබඳව මේ වනවිට සියලු දෙනාගේම දැඩි අවධානයට ලක් වී තිබේ.
රුහුල් හක් අදාළ කාලය තුළ වැටුප් ලැබීමට සුදුසුකම් නැත්තකු වුව ද ඔහු මේ වනවිටත් වැටුප් ඇතුළු වරප්රසද ලබන බවට තොරතුරු හෙළිව ඇත.
තවද ඔහුගේ සේවය අත්හිටුවීම අවලංගු කිරීම සලකා බලන ලෙස ඉල්ලා රුහුල් හක් සෞඛ්ය අමාත්යාංශයට අභියාචනයක් කර ඇති බව ද ඩේලි මිරර් වාර්තා කරයි.
කෙසේ වෙතත්, සෞඛ්ය අමාත්ය කෙහෙළිය රඹුක්වැල්ල ඒ පිළිබඳව කළ විමසීමක දී ඩේලි මිරර් වෙත පවසා ඇත්තේ තමාට මතක ඇති පරිදි මෙම අභියාචනයට ප්රතිචාර නොදැක්වූ බවය.
