මනම්පිටිය නිමල් ජයතරත්න –
මේ රටේ ප්රධානම මහා පරිමාණ වී මෝල් හිමියා රටට ශත පහක බද්දක් නොගෙවන බව එක්සත් සහල් නිෂ්පාදකයන්ගේ සංගමයේ සභාපති මුදිත පෙරේරා අද (09) හෙළිදරව් කළේය.
ඔහු මේ බව සඳහන් කළේ අද සවස පොලොන්නරුව ඕනෑගම ප්රදේශයේ හෝටලයක පැවති මාධ්ය සාකච්ඡාවට එක්වෙමිනි.
ඔහු මෙසේ ද කීවේය.
“ කෘෂිකර්ම අමාත්ය මහින්ද අමරවීර මහතාත් සිසිර ජයකොඩි මහතා හෙළිදරව්වක් කළා මහා පරිමාණ මෝල් හිමියෝ බදු පැහැර හැරීමක් සම්බන්ධව. ඔව්… ඒක හරි.“
“අපිත් දන්නවා ප්රධාන සහල් මෝල් හිමියෝ තුන්දෙනෙක් ඉන්නවා. ඉන් තුන්වැනි ස්ථානය පසුවන අමාත්ය සිරිපාල ගම්ලත් මැතිතුමා රුපියල් කෝටි 5ක මුදලක් බදු වශයෙන් ගෙවද්දී, අනෙත් ව්යාපාරිකයන්ගෙන් එක්කෙනෙක් රුපියල් ලක්ෂ 9 යි බදු ගෙවලා තියෙන්නේ. පළමු ස්ථානයේ ඉන්නවා කියන පුද්ගලයා ආණ්ඩුවට සත පහක්වත් බදු ගෙවල නැහැ. “
“අපි ආණ්ඩුවෙන් විශේෂයෙන්ම ආදායම් බදු දෙපාර්තමේන්තුවෙන් අහනවා කොහොමද එහෙම වුණේ කියලා. තුන්වෙනි ස්ථානයෙ ඉන්න මහා පරිමාණ වී මෝල් හිමියා කෝටි පහකට ආසන්න මුදලක් ආණ්ඩුවට බදු ගෙවද්දි, පළමු ස්ථානයේ ඉන්න වී මෝල් හිමියා බදු නොගෙවා මගහැරලා හිටියේ කොහොමද කියලා අප විමසනවා. මේ සම්බන්ධව විධිමත් පරීක්ෂණයක් කරන්න කියලා අපි ආණ්ඩුවට බල කරනවා.“
ඔහු ප්රකාශ කළේ දැනට ලංකාවේ සහල් මෝල්වලින් සියයට 75කට වැඩි ප්රමාණයක් වැසී ගොස් ඇති බවය.
බැංකු පොලිය වැඩිවීම හේතුවෙන් කුඩා පරිමාණ වී මෝල් හිමියන්ගෙන් දැනට කර්මාන්තයේ ඉතිරි වී සිටින පිරිසට වී මිලදී ගැනීමේ හැකියාව අඩුවෙමින් ඇති බවද පෙන්වා දුන්නේය. මේ සම්බන්ධව පුලුල් වැඩපිළිවෙළක් නිර්මාණය කරන ලෙසත් සහල් ආනයන බද්ද වැඩිකර දේශීය වී ගොවිතැන යථාවත් කිරීමේ වැඩපිළිවෙළක් ආරම්භ කරන ලෙසත් ඔහු රජයෙන් ඉල්ලා සිටියේය.
