ඉරාන ඊශ්රයාල යුද්ධය හේතුවෙන් ඉන්ධන හිඟයක් හෝ ඉන්ධන මිල වැඩිවීමක් සම්බන්ධව කිසිම අවදානමක් නොමැති බව විදුලි බල හා බලශක්ති ඇමති ඉංජිනේරු කුමාර ජයකොඩි අද (18) අවධාරණය කළේය.
ඔහු පැහැදිලිව ප්රකාශ කළේ අගොස්තු මාසය දක්වා අවශ්ය ඉන්ධන තොග සඳහා ලංසු කැඳවා ටෙන්ඩර් ප්රදානය කර අවසන් බවය.
එමෙන්ම මේ වසරේ දෙසැම්බර් දක්වා සැපයුම්කරුවන් ගිවිසුම්ගත වී කොන්ත්රාත් අත්සන් කර ඇති බවත්, ඉන්ධන තොග සැපයුම්වලට අදාලව කිසිම සැපයුම්කරුවෙක් මේ දක්වා ගැටලුකාරී තත්ත්වයක් මතු කර නැති බවත් ඇමතිවරයා කීවේය.
“වර්තමාන ඛනිජ තෙල් තොග තත්ත්වය බලනකොට මේ අගෝස්තු අවසන් වනවිටත් තොග සැපයුම තහවුරු කරන්න පුලුවන්. අපේ ගබාඩවල වගේම ලැබෙමින් ඇති තොග එක්ක ඒක සපුරන්න හැකි වෙලා තියනවා.”
“මේ අවුරුද්දේ දෙසැම්බර් දක්වා ටෙන්ඩර් කැඳවලා කොන්ත්රාත් අත්සන් කරලා තිබෙන්නේ. සපුගස් කන්ද තෙල් පිරිපහදුවට අවශ්ය බොර තෙල් සැපයුමත් දෙසැම්බර් දක්වා සම්පූර්ණ කරලා තියනවා. තෙල් හිඟයක් ඇතිවීමට හෝ විශාල ඉන්ධන මිල වැඩිවීමක් වීමට කිසිම ඉඩක් නෑ.”
“පැමිණෙන තොග බහුතරයක් ඒ කියන්නේ 95%කට වඩා ගැටුම් සහිත කලාපයෙන් පිට. අපට ඉන්ධන තොග එන්නේ ඉන්දියාව සිංගප්පුරුව මැලේසියාවෙන් . බොර තෙල් වගේම පිරිපහදු කරන ලද තෙල් සැපයීම සම්බන්ධව මාස දෙක හමාරක් යනකම්ම කිසිම ගැටලු සහගත තත්ත්වයක් පෙනෙන්න නෑ. එතනින් එහාට ගත්තත් ගිවිසුම් ගත වෙලා ඉන්න සැපයුම්කරුවන්ගෙන් සැපයීමේ අපහසුවක් හෝ අඩාලතාවයක් ගැන කිසිම දැනුම් දීමක් නෑ.” ඇමතිවරයා කීවේ එසේය.
ලෝක වෙළෙඳපලේ තෙල් මිලෙහි උච්ඡාවචනයක් සිදුවන ආකාරයට පිරිවැය ගැලපුම් ඉන්ධන මිල සූත්රය අනුව ඉන්ධන මිලෙහි අඩු වැඩිවීමක් සිදුවිය හැකි වුවද එය හුදු ලංකාවට බලපාන හුදකලා ප්රශ්නයක් නොවනු ඇති බවත්, ලබන මාසයේ ඉන්ධන මිලෙහි වැඩිවීමක් සිදුවීමට ඉඩක් නොමැති බවත් ඇමතිවරයා පැවසුවේය.
ඔහු පෙන්වා දෙන්නේ ඉන්ධන කළමනාකරණය කරමින් මේ ගැටලුවට මුහුණ දීමට රජය සැලසුම් කරමින් සිටින බවය.
ඒ හේතුව නිසා ඉන්ධන තොග රැස්කිරීමේ කිසිම අවශ්යතාවයක් ජනතාවට නැති බවත් ඉන්ධන තොග රැස් කිරීම නීතියෙන් ද තහනම් බැවින් එසේ කරන්නවුන් සඳහා දැඩිව නීතිය ක්රියාත්මක කරන බවත් ඇමතිවරයා පැවසුවේය.
ඔහු පෙන්වා දුන්නේ ඉන්ධන ඇනවුම් කරන්නේ රටට අවශ්ය මාසික ඉන්ධන ප්රමාණය සහ රටේ ගබඩා පිළිබඳ කරන ගණනයකින් අනතුරුව බැවින් අනවශ්ය තොග රැස්කීමකට ගියහොත් සිදුවන්නේ මේ කළමනාකරණය බිඳ වැටී අනවශ්ය අනවශ්ය ගැටලුවක සමාජයම පැටලීම බවය.
එමෙන්ම රට තුළ අනවශ්ය භීතියක් ඇති කරමින් සිදුකරන පදනම් විරහිත ප්රකාශ තරයේ හෙළා දකින බව ද ඇමතිවරයා පැවසුවේය.
ඇමතිවරයා රටට කී කතාව පහත දැක්වේ.
