දිනසේන රතුගමගේ –
අයි.පී.එල් ක්රිකට් තරගාවලියෙන් පසුව තමන්ට ශ්රී ලංකා කණ්ඩාමට ක්රිකට් ක්රීඩකයෙකු වශයෙන් එක් වීමට අවස්ථාවක් හිමිවනු ඇතැයි දැඩි විශ්වාසයක් පවතින බව යාපනයෙන් බිහි වූ නවක පාසල් ක්රිකට් ක්රීඩක විජයකාන්ත් වියස්කාන්තන් යාපනයේදී පැවසීය.
යාපනයේ පැවති මාධ්ය හමුවකදී ඔහු කියා සිටියේ යාපනයේදී තමන්ට ක්රිකට් ක්රීඩකයෙකු වීමට යාපනයේ දෙමළ ජනතාව උදව් උපකාර කළා සේම ජාත්යන්තර ය මට්ටමේ ක්රිකට් ක්රීඩකයෙකු වීමට දකුණේ සිංහල හා අනෙක් ජාතීන්ගෙන් විශාල සහයෝගයක් ලැබෙන බවයි.
ශ්රී ලංකාවේ පරිණතම ක්රිකට් ක්රීඩකයෙකු හා හිටපු නායකයෙකු වන කුමාර් සංගක්කාරගෙන් තමන්ට විශාල සහයෝගයක් ලැබෙන බව ප්රකාශ කළ වියස්කාන්තන් බොහෝ අවස්ථා වලදී සංගක්කාර තමන්ගේ ක්රිකට් ජීවිතයේ අනාගතය ගැන ඉතා දීර්ඝ වශයෙන් බොහෝ දේ සාකච්ඡා කොට ඇති බවද ප්රකාශ කළේය.
බංග්ලාදේශය සමග තමන්ට ක්රීඩා කිරීමට අවස්ථාවක් ලැබීම තුළින් අත්දැකීම් සමුදායක් ලබා ගැනීමට හැකි වූ බව කී වියස්කාන්තන් අයි.පී.එල් තරගාවලියෙන් පසුව තමන්ට වඩාත් ස්ථාවර පන්දු යවනෙකු ලෙස ශක්තිමත් වීමට අවකාශ ඇති බවද සදහන් කළේය.
මෙසේ පියවරෙන් පියවරට තමන්ට ලැබෙන අවස්ථාවන් සමග දකුණේ ජ්යෙෂ්ඨ ක්රිකට් ක්රීඩකයින්ගේ පූර්ණ සහයෝගය තමන්ට ශ්රී ලංකා කණ්ඩායමේ ක්රිඩකයෙකු වීමට ඉදිරි කාලයේදී අවස්ථාව ලබෙනු ඇතැයිද වියස්කාන්තන් මෙහිදී පැවසීය.
