යහපාලන සමයේ සබීතා පෙරෙරා ගේ සැමියාට අයත් රාජගිරියේ පිහිටි ඩී.පී.ජේ. ටවර් ගොඩනැගිල්ල කෘෂිකර්ම අමාත්යාංශය වෙනුවෙන් බදු පදනම මත ලබා ගැනීමේ දී ගොඩනැගිල්ල හිමිකරුවන් භාරයේ තැබූ කෝටි 66ක තැන්පත් මුදල තවමත් රජයට ලැබී නැති බව අද හෙළි දරවු වූයේය.
කෘෂිකර්ම අමාත්යාංශ ලේකම් එම්.පී.එම්. වික්රමසිංහ අද හෙළිදරවු කළේ අදාල ගොඩනැගිල්ල ආපසු භාර දී වසර ගණනාවක් ගතවී ඇති නමුත් අදාල මුදල රජයට ලැබී නොමැති බවය.
කෘෂිකර්ම ලේකම්වරයා ඒ සම්බන්ධව කිවේ මෙවැනි කතාවකි.
“කෘෂිකර්ම අමාත්යාංශය සම්බන්ධව කතා කළහොත් ඇත්තටම විවිධාකාරයේ අවිධිමත් ගනුදෙනු සම්බන්ධවත් අපට වාර්තා වෙනවා. උදාහරණයක් වශයෙන් කෘෂිකර්ම අමාත්යාංශයට පෞද්ගලික අංශයෙන් ගොඩනැගිල්ලක් කුලියට අරන් තිබුණා. මේ කුලියට ගැනීම සම්බන්ධයෙනුත් යම් යම් ආකාරයේ විවේචනයන් තිබුණා. එම ගොඩනැගිල්ල කුලියට ගන්නා අවස්ථාවේ දී රුපියල් කෝටි 66ක තැන්පත් මුදලක් තබලා තියනවා.”
“සාමාන්යයෙන් තැන්පත් මුදලක් රජයේ මුදල්වලින් තියනවා නම් ඒකට බැංකුවකින් බැඳුම්කරයක් ලබා ගන්නවා. එහෙම බැඳුම්කරයක් ලබාගෙනත් නෑ, ”
“දැනට මේ බිල්ඩින් එක භාර දීලා වසර ගණනක් වෙනවා. ඒ කෝටි හැට හයක තැන්පත් මුදල ලබාගෙනත් නෑ, ලබා ගැනීමට කටයුතු කරලත් නෑ. මේ සම්බන්ධයෙන් මම නීතිතුමා දැනුම්වත් කරලා දැනට කටයුතු කරමින් පවතිනවා. නීති මාර්ගයෙන් මොකක්ද කරන්න පුලුවන් කියලා සොයා බැලීමට.”
කෘෂිකර්ම ලේකම් වරයා කීවේය.
කෘෂිකර්ම අමාත්යංශයට මෙම ගෙඩනැගිල්ලේ පවත්වා ගැනීමට මසකට රුපියල් ලක්ෂ 240ක වියදමක් දැරීමට සිදුවූයේය. කෘෂිකර්ම අමාත්යාංශය රාජගිරියේ පිහිටි ගොඩනැගිල්ලකට ගෙනයෑමේ දී සිදුවූ රාජ්ය මුදල් අවභාවිතය සම්බන්ධව කෝප් කමිටුවේ මෙන්ම එකල ආණ්ඩුවේ වංචා දූෂණ විමර්ශනය කළ ජනාධිපති කොමිසමේ ද අවධානය යොමු වූයේය.
කොමිසම හමුවේ හෙළිදරවු වූ කරුණු අනුව මෙම ගොඩනැගිල්ලට රජය වැය කළ මුළු මුදල රුපියල් බිලියන දෙකයි මිලියන සීයකට ආසන්න බව හෙළි වූයේය.
බදු ගිවිසුම් වසර පහක් සඳහා අත්සන් කර තිබුණේ මූල්ය රෙගුලාසි උල්ලංඝණය කරමින් බවත්, රාජ්ය ආයතනයක් සඳහා එවැනි බදු ගිවිසුම් අත්සන් කළ හැක්කේ උපරිම අවුරුදු තුනක් සඳහා පමණක් බව වාර්තා විය. ගොඩනැගිල්ල සඳහා බදු ගිවිසුම් සඳහා නිතිපති අනුමැතය ද ලබාගෙන නොතිබුණු බව හෙළි වී තිබිණි.
බදු ගැනීම සඳහා තැන්පත් කළ රුපියල් කෝටි 62ක තැන්පත් මුදල තවමත් ලබාගෙන නැත්තේ ඒ පසුබිමේ දි ය.
