සිහි නුවණින් යුතුව කල්පනා කර බලා පිට පළාත්වල බැතිමතුන් මෙවර උඳුවප් පොහොය නිමිත්තෙන් අනුරාධපුර ශුද්ධ භූමිය වන්දනා කිරීම සඳහා නොපැමිණෙනවා නම් වඩාත් යහපත් බව අටමස්ථානාධිපති පූජ්ය පල්ලේගම හේමරතන නා හිමියෝ පවසති.
රටේ පවතින ආපාදාකාරී තත්ත්වය තුළ වඩාත් කල්පනාවෙන් කටයුතු කළ යුතු බව පෙන්වා දෙන නා හිමියෝ සිදුකළ යුතු නියමිත වතාවත් ඒ අයුරින්ම සිදුවන බව ද අවධාරණය කරති.
“ශ්රී ලංකා වාසීන්ට විශේෂ වැදගත් පොහොය දිනයක් වගේම, අනුරාධපුරයට ඉතා සුවිශේෂී පොහොය දිනයක් වන උඳුවප් පුර පසළොස්වක පොහොය දිනය කියන්නේ සංඝමිත්තා රහත් මෙහෙණින් වහන්සේ වෙනුවෙන් දඹදිව බුද්ධ ගයාවේ සිට ශ්රී මාහා බෝධීන් වහන්සේගේ දක්ෂණ ශාඛාව මෙරටට වැඩම කරවාගෙන අනුරාධපුරයේ මහමෙව්නාවේ රෝපණය කළ පොහොය දිනයයි.”
“සංඝමිත්තා රහත් මෙහෙණින් වහන්සේ අනුස්මරණය කරමින් සහ බෝධී රෝපණය අනුස්මරණ කරමින් අනුරාධපුරයේ ශ්රී මහා බෝධීන් වහන්සේ කේද්රකරගනිමින් වතාවත් කරන පොහොය දිනයයි.”
” කරුණු එහෙම වුණත් මේ රටේ දැනට පවතින තත්ත්වයත් එක්ක මේ වෙලාවේ ඉතාම කරුණාවෙන් මෛත්රියෙන් අනුරාධපුරයෙන් බැහැරව ඉන්න අපේ සැඳැහැවතුන්ට මතක්කරන්න කැමතී. වෙනදා වාගේ නැතිව පවතින වාතාවරණය පිළිබඳව නුවනින් කල්පනා කරලා අනුරාධපුරයට දුරබැහැරින් එන සඳැහැවතුන් මේ පොහොය දවසේ වන්දනාමාන කිරීම සඳහා නොපැමිණෙනවානම් හොඳයි කියන එක මගේ පෞද්ගලික අදහස. අපි ආගමික වතාවත් කිසිදෙයක් අඩු නැතුව සිදුකරනවා. ඒ වගේම මේ ව්යසනයෙන් විපතට පත් වුණු සහ මියගිය සියලුදෙනාට පිං අනුමෝදන් කරන්න බලාපොරොත්තු වෙනවා.”
