දිනසේන රතුගමගේ –
මුදල් අයකිරීමේ ක්රමයක් මත ඉන්දීය ධීවරයින්ට උතුරු මුහුදේ මසුන් මැරීමට අවසර ලබා දීමට හිටපු ධීවර අමාත්යවරයා විසින් සිදු කොට තිබූ සැලසුම ක්රියාත්මක නොකරණ බව වත්මන් ධීවර අමාත්ය රාමලිංගම් චන්ද්රසේකර් උතුරේ ධීවර සංගම් නියෝජිතයින්ට ප්රකාශ කොට සිටියේය.
ධීවර අමාත්ය රාමලිංගම් චන්ද්රසේකර් ඊයේ (10) පැවසුවේ හිටපු ධීවර අමාත්ය ඩග්ලස් දේවානන්දා රජය හා ධීවර දෙපාර්තමේන්තුව සමග මීට ඉහතදී සාකච්ඡා පවත්වා ඉන්දීය ධීවරයින්ට උතුරු මුහුදේ මසුන් මැරීමට අවස්ථාවක් ලබා දීමට පියවර රැසක් අනුගමනය කිරීමට කටයුතු සූදනම් කොට තිබූ බවය.
එවැනි ක්රියාමාර්ග අනුගමනය කිරීමෙන් ඉන්දු – ලංකා ධීවර ගැටලු වලට කිසිම ආකාරයක විසඳුමක් නොලැබෙන බව ප්රකාශ කළ ධීවර අමාත්යවරයා කළ යුතු එකම විකල්පය වන්නේ ඉන්දීය රජය හා ශ්රි ලංකා රජය සෘජුවම සාකච්ඡා කොට ඉතා සුහදශීලීව මේ ප්රශ්නයට විසදුමක් සපයා ගැනීම බවය.
මේ වන විට ඉන්දීය ධීවරයින් වැඩි වශයෙන් උතුරු මුහුද ආක්රමණය කරන මොහොතක කුමන හෝ අවසරයක් ඉන්දීය ධීවරයින්ට උතුරු මුහුදට පැමිණීමට ලබා දුනහොත් එය විශාල තර්ජනයක් මෙන්ම විසදා ගත නොහැකි ප්රශ්නයක් බවට පත්වන බවද අමාත්යවරයා ප්රකාශ කළේය.
ඉන්දීය රජය සමග සාකච්ඡා කොට මේ ප්රශ්නයට විසදුමක් ලබා ගන්නා තුරු බලහත්කාරයෙන් උතුරු මුහුදට පැමිණෙන ඉන්දීය ධීවරයින්ව නාවික හමුදාව මගින් අත් අඩංගුවට ගෙන අධිකරණවලට ඉදිරිපත් කිරීම නතර නොකරණ බවද ධීවර අමාත්ය රාමලිංගම් චන්ද්රසේකර් ප්රකාශ කළේය.
උතුරේ ධීවර සංගම් වෙත අදහස් දැක් වූ අමාත්යවරයා මාධ්ය වෙතද මෙම අදහස් ප්රකාශ කොට සිටියේය.
