මනම්පිටිය නිමල් ජයරත්න
මැතිවරණ නීති උල්ලංඝනය කරමින් සර්ව ජන බලවේගයේ පොළොන්නරු දිස්ත්රික් සංවිධායක මෙන්ම මෙන්ම මහ මැතිවරණ අපේක්ෂක දහම් සිරිසේනගේ රුව ඇතුළත් පෝස්ටර් අලවමින් සිටි අයෙකු, පෝස්ටර් තොගයක් සහ කැබ් රථයක් සමග අද සවස අත් අඩංගුවට ගත් බව සිරිපුර පොලිසිය පවසයි.
රන්කෙත්ගම ප්රදේශයේ දි මෙම පුද්ගලයාත් කැබ් රථයත් අත් අඩංගුවට පත්වෙද්දී ඔහු සමග පෝස්ටර් අලවමින් සිටි සෙසු පිරිස පලාගොස් ඇති බව ඒ පිළිබඳ පරීක්ෂණ සිදු කරන සිරිපුර පොලිස් ස්ථානාධිපති පොලිස් පරීක්ෂක ජී.ආර්.ජී.නෙත්ත සූරිය අප කළ විමසීමකදී පැවසීය.
අත්අඩංගුවට ගත් සැකකරු දිඹුලාගල නවමිල්ලාන ප්රදේශයේ පදිංචි අවුරුදු හැටක් පමණ වයසති අයෙකි. අත්අඩංගුවට ගත් සැකකරුට එරෙහිව මැතිවරණ නීති උල්ලංඝනය කිරීම යටතේ නීතිමය පියවර ගැනීමට අවශ්ය කටයුතු කරන බවද සිරිපුර පොලිසිය සඳහන් කරයි.
මැතිවරණ නීති උල්ලංඝණය කරන පුද්ගලයින් පිළිබඳව නීතිය තදින්ම ක්රියාත්මක කරන ලෙස මැතිවරණ කොමිසම විසින් පොලිසියට නියෝග කර තිබිණි. මැතිවරණ නීති උල්ලංඝනය යනු කුමක්දැයි ඉතා පැහැදිලි ලිඛිත උපදේශනයන් මගින් ජනතාව දැනුම්වත් කිරීමට ද කොමිසම මින් පෙර කටයුතු කළේය.
