දිනසේන රතුගමගේ –
ගල් ගසා මරා දමා දමන ලද අඹු සැමි යුවලකගේ මළ සිරුරු පේදුරුතුඩුව පොලීසිය විසින් අද (30) සොයා ගෙන තිබේ. යාපනයේ පේදුරුතුඩුව කර්කෝලවම් පුනිතනගර් ප්රදේශයේ නිවසක සිටි මෙම අඹු සැමි යුවල මරා දමා ඇත්තේ ඔවුන්ගේ හිසට හා ශරීරයේ බොහෝ ස්ථාන වලට විශාල ප්රමාණයේ කොන්ක්රීට් අතහැරීමෙන් බව පොලිසිය පවසයි.
මෙසේ මරා දමා ඇත්තේ 53 හැවිරිදි සැමියා වන මානික්කම් සුබ්රමනියම් සහ 54 හැවිරිදි මේරි නමැති ඔහුගේ බිරිඳය.
සැමියා කොන්ත්රාත් පදනම මත පේදුරුතුඩුව රෝහලේ කිලිටි රෙදි සේදීම වෘත්තිය වශයෙන් කර ගෙන ගොස් ඇති අතර ඔහු සේවයට නොපැමිණීම නිසා රෝහලෙන් ඔහුට දුරකථන ඇමතුම් ලබා දී තිබේ.
එම ඇමතුම් වලට ප්රතිචාර නොලැබුණු නිසා රෝහලේ සේවකයෙකු කිලිටි රෙදි සෝදන්නාගේ නිවසට පැමිණී අවස්ථාවේදී සැමියාගේ හා බිරිදගේ මළ සිරුරු නිවසේ තිබෙනු දැක තිබේ. වහාම මොහු මේ පිළිබදව රෝහලට දැණුම් දීමෙන් පසුව ය සිද්ධිය පිළිබඳව පොලිසිය දැනුම්වත් කිරීමට රෝහල් බලධාරීන් කටයුතු කර තිබේ. අපරාධ ස්ථානයට පැමිණි පොලිසියට දැකගත හැකි වී ඇත්තේ විශාල කොන්ක්රීට් ගල් අත්හැර හිස පොඩි කර ඝාතනය කර සිටි යුවලය. බරපතල තුවාල වලින් අධික ලෙස රුධිරය වහනය වීම නිසා අඹු සැමි යුවල එම ස්ථානයේදීම මියගොස් සිටි බව පේදුරුතුඩුව පොලිසිය අප කළ විමසුමකදී පැවසුවේය.
පොලීසිය කළ දැණුම් දීම මත පේදුරුතුඩුව මහේස්ත්රාත්වරයා සිද්ධිය වූ ස්ථානයට පැමිණ ස්ථානීය මරණ පරීක්ෂණය පැවැත් වූයේය. මළ සිරුරු යාපනය ශික්ෂණ රෝහල වෙත රැගෙන ගොස් අධිකරණ වෛද්ය නිලධාරීවරයා ලවා පශ්චාත් මරණ පරීක්ෂණය පවත්වා එම වාර්තාව අධිකරණයට ඉදිරිපත් කරණ ලෙසද මෙම සිද්ධියට සම්බන්ධ සැකකරුවන් වහාම අත් අඩංගුවට ගන්නා ලෙසද මහේස්ත්රාත්වරයා පොලීසියට නියෝග කළේය.
පේදුරුතුඩුව පොලීසිය සිද්ධිය සම්බන්ධයෙන් පරීක්ෂණ පවත්වා ගෙන යයි.
