අස්ගිරි මහා නායක හිමියන්ගේ අත්සන ව්යාජ ලෙස යෙදූ බවට තමන්වහන්සේට එල්ල වී ඇති අභූත චෝදනාව අධිකරණය ඉදිරියේම විසඳා ගැනීමට ලැබේ නම් ඉතාම සතුටුවන බව රාමඤ්ඤ මහා නිකායේ දක්ෂිණ ලංකාවේ ප්රධාන සංඝ නායක ආචාර් පූජ්ය ඕමල්පේ සෝබිත නා හිමියෝ පැවසූහ.
මේ පිළිබඳව ලංකාසර කළ විමසීමක දී උන්වහන්සේ කීවේ යම් කුඩා දේශපාලන කණ්ඩායමක් නීතිඥ පිරිසක් සමග රහස් පොලිසියට ගොස් පැමිණිල්ලක් කිරීම සම්බන්ධව ඊයේ ජාතික රූපවාහිනියෙන් දුටු බවත්, අද වෙබ් අඩවි කිහිපයක මේ සම්බන්ධව තොරතුරු පලවී තිබෙනු දුටු බවත්ය. මෙවැනි බරපතල අකටයුත්තක් තමන් වහන්සේ අතින් හෝ වෙනත් ඕනෑම කෙනෙක් අතින් සිදුවී ඇතිනම් ඒ ගැන මුලින්ම විමසිය යුත්තේ අතිපූජ්ය මහානායක හිමිවරුන්ගෙන් බව ද උන්වහන්සේ කීහ.
“හොර අත්සන් සිද්ධියක් නම් ඒක අපරාධයක් නෙ. අනික මහා නායක හිමිවරුන්ගෙ අත්සන්නෙ හොරට ගහල තියනවා කියන්නේ. මෙහෙම දෙයක් වෙලා තියනව ද නැද්ද කියලා මුලින්ම අහන්න ඕන මහා නායක හාමුදුරුවන්ගෙන්නෙ.“
“ මේ විදිහෙ නිර්මාණ තව ඉස්සරහටත් එයි. මේ සිද්ධි අධිකරණය ඉදිරියට යන එකම තමයි හොඳ.“ උන්වහන්සේ ලංකාසරට පැවසූහ.
මහා නායක හිමිවරුන් විසින් ආණ්ඩුව වෙත ඉදිරිපත් කර ඇති මගපෙන්වීම් ක්රියාත්මක කරවීම සඳහා බලපෑම් කිරීමේ අභාලාෂයෙන් සහ රජයට එරෙහිව මහා නායක හිමිවරුන් දැක්වූ සංඝ සම්මුතියක් සම්බන්ධයෙන් යළි සිහි කැඳවීමට මහා සංඝ සම්මේලනය සංවිධානය කරන්නේ ආචාර්ය ඕමල්පේ සෝබිත හිමිපාණන්ය.
උන්වහන්සේ ගෝල්ෆේස් අරගල බිමට මහා සංඝයා සමග කිහිප වරක්ම වැඩම කර සෙත් පිරිත් සජ්ඣායනා කර අරගලකරුවන්ට සෙත් පතා තිබුණහ.
