-
CID ය CCTV වත් පරීක්ෂා කරලා නෑ… වහාම විමර්ශන කටයුතු කර අපරාධකරුවන් අත් අඩංගුවට ගන්නා ලෙස ගල්කිස්ස අතිරේක මහේස්ත්රාත්වරිය අපරාධ පරීක්ෂණ දෙපාර්තමේන්තුවට නියෝග කරයි….
ලක්බිම, අරුණ ඇතුළු ජාතික පුවත්පත් ගණනක සේවය කළ ප්රකට මාධ්යවේදිනියකවූ ශ්රියානි විජේසිංහගේ ගේ සැමියාගේ අභිරහස් මරණය සම්බන්ධයෙන් පශ්චාත් මරණ පරීක්ෂණ වාර්තාවට අනුව මරණයට හේතුව මොට ආයුධයකින් පහරදීමෙන් හිසෙහි දකුණු පැත්තෙහි රුධිර වහනයක් වීමක් බවත් මේ මරණය පසුපස අපරාධයක් සිදුව ඇතැයි පෙනී යන බවත් ගල්කිස්ස අතිරේක මහේස්ත්රාත් හේමාලි හාල්පන්දෙණිය අද (10) ප්රකාශ කළාය.
මරණයට අදාළව අපරාධයක් සිදුව ඇති බවට පෙනී යන හෙයින් කඩිනමින් විමර්ශන සිදු කර සැකකරුවන් අධිකරණයට ඉදිරිපත් කිරීමට මහේස්ත්රාත්වරිය අපරාධ පරීක්ෂණ දෙපාර්තමේන්තුවට නියෝග කළාය.
මාධ්යවේදිනී ශ්රියානි විජේසිංහගේ සැමියා පසුගිය ජනවාරි මස 3 වන දින දෙහිවල හිල් වීදියේ නීතිඥවරියකට අයත් නිවසෙහි මිදුලෙහි වැටී සිට ඇති අතර රෝහල් ගත කිරීමෙන් අනතුරුව මිය ගියේය. මේ සම්බන්ධයෙන් නීතිඥවරියගේ සැමියා වන හිටපු ගුවන් හමුදා නිලධාරියාගේ සාක්ෂි සටහන් කර ගැනීම අද දින සිදු විය.
සාක්ෂිකරුවන්ගේ සාක්ෂි මඟින් මරණය සම්බන්ධව කිසිදු අපරාධයක තොරතුරක් අනාවරණය නොවූවද මරණ පරීක්ෂණ වාර්තාවට අනුව මෙය අපරාධයක් බවට පෙනී යන බව අතිරේක මහෙස්ත්රාත්වරිය පැවසුවාය.
මරණකරු මිය යෑමට පෙර එදින අදාළ නීතිඥවරියගේ නිවස දෙසට යන ආකාරය CCTV දර්ශන වල සටහන්ව තිබුණ බව පොලිසිය කීවේය. නම් ඔහු නිවස දෙස සිට නැවත මාර්ගයට පැමිණි බවට එහි නිවැසියෝ පවසයි නම් ඔහු පැමිණි බවට පැවසෙන CCTV දර්ශන ලබා ගෙන ඒ සම්බන්ධයෙන් විමර්ශන සිදු නොකළේ මන්දැයි අතිරේක මහේස්ත්රාත්වරිය අපරාධ පරික්ෂණ දෙපාර්තමේන්තුවේ නිලධාරින්ගෙන් විමසීය.
ඒ සම්බන්ධයෙන් විමර්ශන සිදු කර අධිකරණයට ඉදිරිපත් කරන බවට අපරාධ පරික්ෂණ දෙපාර්තමේන්තුවේ නිලධාරින් මහේස්ත්රාත්වරියට පැවසීය.
අගතියට පත් පාර්ශවය වෙනුවෙන් ගීත්ම ප්රනාන්දු,වරුණ ජයසිංහ, අරුණි රණසිංහ යන නීතිඥ මහත්ම මහත්මීන් පෙනී සිටියහ.
