අසේල කුරුළුවංශ –
තෙල්දෙණිය මූලික රෝහලේ වෛද්ය අධිකාරිවරයාගේ සහ කාර්ය මණ්ඩලයේ රාජකාරි වලට බාධා වන අයුරින් හැසිරීමේ සිද්ධියක් සම්බන්ධයෙන් එම රෝහලේ වෛද්යවරයෙකු තෙල්දෙණිය පොලීසිය විසින් (09) පස්වරුවේ සැකපිට අත්අඩංගුවට ගෙන තිබේ.
මෙම වෛද්යවරයා පසුගිය අගෝස්තු මස 22 වැනි දින ද රෝහල් කාර්ය මණ්ඩලයේ රාජකාරියට බාධා වන ලෙස හැසිරීමේ සිද්ධියක් සම්බන්ධයෙන් අත්අඩංගුවට ගෙන අධිකරණයට ඉදිරිපත් කළ බව පොලීසිය පවසයි.
ඔහු මානසික රෝගි තත්ත්වයකින් පෙළෙන බවට එම අවස්ථාවේ පොලීසිය අධිකරණයට කරුණු වාර්තා කර තිබිණි. එම අවස්ථාවේ අධිකරණය මගින් සැකකාර වෛද්යවරයා ඇප මත මුදාහැර ඇත්තේ මානසික රෝගි තත්ත්වය සඳහා ප්රතිකාර ගැනීමට යොමු කරන බවට ඔහු ගේ සහෝදරයෙකු දැක්වූ එකඟතාව පදනම් කර ගෙනය.
ඇප මත නිදහස්ව පැමිණි වෛද්යවරයා ඉන් පසුවද දිගින් දිගටම තමන්ගේ හා රෝහලේ සෙසු කාර්ය මණ්ඩලයේ වැඩ කටයුතු වලට බාධා ඇතිවන සේ කටයුතු කළ බව තෙල්දෙණිය රෝහලේ වෛද්ය අධිකාරිවරයා පැවසුවේය.
බැන වැදීම් හා තර්ජනය කිරීම් පවා සිදු කිරීම හේතුවෙන් ඊයේ (09) යළි තෙල්දෙණිය මූලස්ථාන පොලීසියට පැමිණිල්ලක් කිරීමට සිදුවූ බවත් මෙම වෛද්යවරයා අධිකරණ නියෝගයට අනුව ප්රතිකාර වලට යොමුවූ බවක් පෙනෙන්නට නොමැති බවත් වෛද්ය අධිකාරිවරයා කීය.
