මහ ජාතියෙ නායක ඇත්න්ගෙ බාලතැනේ වැඩ ලෝකෙට කන්න දුන්න අපේ රට හිඟමනට දැම්මා – වන්නිලා ඇත්තෝ වේදනාවෙන්!

කීර්ති ප්‍රනාන්දු  –

ලෝකයේ අනෙක් රටවලටත්  කන්න දුන්, උපකාර කළ  මේ රට හිඟා කන තැනට දැම්මේ   මහා ජාතියේ  නායකයින්ගේ  බාලතැනේ  වැඩ  බව ආදි වාසී නායක වන්නිලා ඇත්තෝ ලංකාසරට පැවසූහ.

“මහ ජාතිය නම් කරන්න ඕන මහා වැඩ.. ඒත් කරපු තරමක් කළේ බාලතැනේ වැඩ“ වන්නිලා ඇත්තෝ කීහ.

වන්නිලා ඇත්තෝ වැඩිදුරටත් මෙසේ පැවසූහ.

“ මේ රට හිඟා කාපු රටක් නෙමෙයි. අනෙක් රටවල් වලටත් කන්න දීපු රටක්. උපකාර කළ රටක්. අපිත් උන්නෙ මහා ආඩම්බරෙන්.   මේ රටේ නායකයො කියන්නෙ ඒ අය මේ රටේ මහ ජාතියෙ කියලා. දැන් ඒ මහ ජාතියට වෙලා තියෙන්නෙ රටක් රටක් ගානෙ ගිහින් ඉල්ලගෙන කන්න…හිඟා කන්න.“

“ මේ තැනට අපේ රට දාපු එකට හැම කෙනෙක්ම වගකියන්න ඕන. දැන්වත් මේ දේශපාලකයින් හිතන්න ඕන තමන්ගෙ බලය ගන්න විදිහ නෙමෙයි. මේ රට වැටිලා තියන තැනින් ගොඩට ගන්නෙ කොහොමද කියන   එක.  ඒත් මේ අය කරන්නේ හිඟමනට වැටුණු රටේ  තත්ත්වය තමන්ට බලය එන්න ආයුධයක් කරගන්න හදන එක. එහෙම බලයට ඇවිත් ආයෙ මොනව කරන්න ද?. කරන්න දෙයක් තවත් ඉතිරි වෙයි ද?. තේරුම් ගන්න ඕන දැන්නම්  තනි තනියෙන් කාටවත් ගමනක් නැති බව. එකට එකතු වෙලා වැඩ කරන්න බැරිනම් අපි හැමෝම මහා විනාසෙකට යනව තව පොඩි කාලයකින්. “

“රට හැම අතින්ම ප්‍රපාතයට ගිහින්. එක රැයකින් පොහොර තහනම් කළා. ඒකෙ ප්‍රතිඵල දැන් ලැබිලා තියනවා.  කෘෂිකර්මය බිංදුවට වැටිලා.“

“කන්න තිබුනොත් තමයි ජාතියක් ඉතිරි වෙන්නෙ. කන්න නැති මිනිස්සු ඉන්න රටක් පාලනය කරන්නෙ කොහොමද?. මොන රටක මොන දේශපාලන නායකයො හැදුවත් පළමුව  ඒ රටේ මිනිස්සු ජීවත්වෙලා ඉන්න ඕන. ව්‍යවස්ථාව ගැන බඩගින්නෙ ඉන්න මිනිස්සුන්ට තේරෙන්නෙ නෑ.  මේ මිනිස්සු ගොඩදාල බලය හදාගන්න… මිනිස්සු ගොඩ දාන්න කල් නෑ. ඒත් බලය හදාගන්න  එකට කල් තියනවා.

“මහ ජාතිය විදිහට මහා වැඩ කරන්න හැම කෙනාම එකට එකතු වෙන්න. හැමෝම එකතුවෙලා  මේ රට බේරගනිමු.“ වන්නිලා ඇත්තෝ කීහ.