නීතිපති නියෝගය ප්රකාරව බස්නාහිර පළාත් ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන්ට ස්ථාන මාරුවක් ලබා නොදීම සම්බන්ධව කරුණු දැක්වීම සඳහා පොලිස්පති ඩී.සී.වික්රමරත්න අද මේ වනවිට කොටුව මහේස්ත්රාත් අධිකරණය වෙත ගොස් ඇත.
ඔහුට නීති සහාය ලබා දීම සඳහා පොලිස්පතිවරයාගේ සමීපතමෙයක් වූ ජ්යෙෂ්ඨ පොලිස් අධිකාරී නීතිඥ රුවන් ගුණසේකරත් පොලිස්පතිවරයා සමග ගොස් ඇත.
නිතිපතිවරයා විසින් ලබා දුන් උපදෙස් අනුව ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් වෙත ස්ථාන මාරුවක් ලබා නුදුන්නේ එය පොලිස්පතිගේ බලයෙන් පිට කටයුත්තක් නිසා බවත්, එය කළ යුත්තේ රාජ්ය සේවා කොමිෂන් සභාවෙන් බවත් පොලිස්පතිවරයා නීතිපතිවරයා වෙත දන්වා තිබිණි.
එහෙත් පසුගිය අප්රේල් 24 වැනිදායින් පසු රාජ්ය සේවා කොමිෂන් සභාවේ ආවරණ අනුමැතියට යටත්ව මහජන ආරක්ෂාක අමාත්යාංශ ලේකම්වරයා විසින් පොලිස්පති නිර්දේශ පිට ජ්යෙෂ්ඨ නියෝජ්ය පොලිස්පතිවරු 06 දෙනෙක් ස්ථාන මාරුකර තිබිණි.
මෙම ස්ථාන මාරු වීම් පිළිබඳව රාජ්ය සේවා කොමිසමෙන් මහජන ආරක්ෂක අමාත්යාංශ ලේකම්වරයාට ලබා දී ඇති බල තල ඉක්මවා කටයුතු කර ඇති බව දන්වා දින තුනක් ඇතුළත වහාම මේ පිළිබඳව පූර්ණ වාර්තාවක් ලබා දෙන ලෙස මේ වනවිට රාජ්ය සේවා කොමිෂන් සභාව මහජන ආරක්ෂක ලේකම්වරයා වෙත නියෝග කර ඇත.
