සූරියවැව – නුවන් ජයසේකර
මඩ පොහොර බෙදා දීමේදී ඇති වු අමනාපයකට තංගල්ල නෙටොල්පිටිය කෘෂිකර්ම කාර්යාලයේ කෘෂිකර්ම පර්යේෂණ නිළධාරිණියක මහ මග දී කපා කොටා මරා දැමීමේ සිද්ධියට සම්බන්ධ සැකකරු පොලිස් අත්අඩංගුවට පත් වී තිබේ.
ඊවේ (27) උදේ සුපුරුදු පරිදි කෘෂිකර්ම පර්යේෂණ නිලධාරිණියට වැඩට එන විට නොටොල්පිටිය වැලිආරේදී මන්නයකින් කපා කොටා ඇයව මරා දමා තිබුණු බව තංගල්ල පොලිසිය කීවේය.
මෙලෙස ඝාතනය කර ඇත්තේ තංගල්ල නෙටොල්පිටිය කෘෂිකර්ම කාර්යාලයට අනුයුක්තව කෘෂිකර්ම පර්යේෂණ නිළධාරිණියක ලෙස කටයුතු කල අංක 189, වැලිආර, නෙටොල්පිටිය ,තංගල්ල ලිපිනයේ පදිංචි රත්නායක මුදියන්සේලාගේ දීපෂිකා ලක්රුවනී විජේදාස නැමති 30 හැවිරිදි විවාහක කාන්තාවකි.
ඝාතනය සම්බන්ධව පොලිස් අත්අඩංගුවට පත් වී ඇත්තේ ඇයගේ නිවසට යාබද නිවසක පදිංචි පුද්ගලයෙකි.
සිද්ධිය සම්බන්ධයෙන් තංගල්ල පොලිසියට ලද තොරතුරකට අනුව සිදුකල මුලික විමර්ශනවලදී මෙම ඝාතනය සිදුකවළ බව කියන මෙ 39 හැවිරිදි සැකකරු අත්අඩංගුවට ගෙන තිබේ.
අත්අඩංගුවට පත් පුද්ගලයා මිට දින කිහිපයකට පෙර මඩ පොහොර බෙදාදීමක් සම්බන්ධයෙන් ඝාතනයට ලක් වු කෘෂිකර්ම පර්යේෂණ නිළධාරිණිය සමග බහින් බස් විමක් ඇති කරගෙන තිබුණු බව විමර්ශනවලදී හෙළි වී ඇත.
අත්අඩංගුවට පත් සැකකරු තංගල්ල මහේස්ත්රාත් අධිකරණයට ඉදිරිපත් කිරීමට නියමිත අතර සිද්ධිය පිළිබඳව තංගල්ල කොට්ඨාස භාර ජ්යෙෂ්ඨ පොලිස් අධිකාරී කීර්ති රත්නගේ උපදෙස් පරිදි තංගල්ල පොලිසියේ අපරාධ අංශයේ නිළධාරීන් විසින් වැඩිදුර පරික්ෂණ පවත්වයි.
