ගුවන්තොටුපලින් පිටවීමට ගොස් පොලිස් අත්අඩංගුවට පත් කළුමිණි රවිදු සංඛ ද සිල්වා නොහොත් බූරු මූණාව බේරාගන්නට මහ රෑ පැමිණි හෙට්ටිපොල රිට්ටාදෙනිය ශ්රී ජය ලංකාරාම විහාරස්ථානයේ විහාරාධිපති පොත්තේවෙල ඉන්ද්රසාර (38) නැමැති ශ්රමණයා සහ මහා පරිමාණ කඩු ජාවාරම් කාර පාතාල අපරාධකරුවෙක් ලලිත් කන්නංගර නැමැති අපරාධකරු අතර සමීප සම්බන්ධතාවයක් තිබී ඇතැයි පොලිසිය සිදුකළ විමර්ශනවලදී හෙළි වී තිබේ.
හංවැල්ල ආපනශාලා හිමිකරු ඝාතනය කිරීම සඳහා බූරු මූණාව යොදවාගෙන ඇත්තේ මෙම පාතාල අපරාධකරු වූ ලලිත් කන්නංගර විසිනි. ලලිත් කන්නන්ගරගේ උවමනාවකට අනුව පසුගිය දෙසැම්බර් 18 වෙනිදා හංවැල්ලේ පිහිටි මුස්ලිම් හෝටලයේ හිමිකරු ඝාතනයට බූරුමූණා ලබා දී ඇත්තේ හරක්කටාය.
බූරු මූණා කවුද?
දැනට ඩුබායිහි වෙසෙමෙන් මෙරට ඝාතන ජාලයක් මෙහෙයවන මත්කුඩු ජාවාරම්කාර පාතාල අපරාධකරුවෙක් වූ හරක්කටා ගේ සැඟවුණු ප්රධාන වෙඩික්කරු වී ඇත්තේ කළුමිණි රවිඳු සංඛ ද සිල්වා නොහොත් බූරු මූණාය. ඔහු නාවික හමුදාවෙන් පලා ආ සෙබලෙකි.
මෙම තැනැත්තා යොදවා විටින්විට හරක්කටා විසින් දිවයින පුරා ඝාතන 20කට වැඩි ප්රමාණයක් සිදුකර තිබිණි.
ඉතා පැහැදිලි සීසීටීවී දර්ශන සහිතවීම නිසා රටම කැළඹූ ඝාතනයක් වූ හංවැල්ල ආපනශාලා හිමිකරු ඝාතන සිද්ධියත් සමග ප්රධාන ඝාතකයා ලෙස සැකකර පොලිසිය පුද්ගලයෙක් ඝාතනය කර 06 දෙනෙක් අත්අඩංගුවට ගෙන තිබුණු අතර පසුව හෙළි වූයේ ඝාතනය වී තිබුණේ වෙඩික්කරු නොව වෙඩික්කරු පැමිණි බයිසිකලයේ පැදිකරු බවය.
මෙම වෙඩික්කරු අනාවරණය වීමෙන් පසු ඔහු සම්බන්ධව වැඩිදුර විමර්ශනය කළ පොලිස් විමර්ශකයින්ට ඝාතනයට උපකාර කිරීම සම්බන්ධව සැක පිට අත්අඩංගුවට ගත් පුද්ගලයෙකුගේ ජංගම දුරකථනයේ තිබී ගමන් බලපත්රයක ඡායාරූපයක් හමු වී තිබිණි.
මෙම ගමන් බලපත්රය බූරුමූණා හෙවත් කළුමිණි රවිඳු සංඛ ද සිල්වාගේ මුහුණ යොදා පාදුක්ක වග පදිංචිකරුවෙකු වූ කෝරලේකම්කානම්ලාගේ රවිදු වර්ණ රංග නමින් සකස් කළ ව්යාජ විදෙස් ගමන් බලපත්රයක් බව පොලිස් විමර්ශන අංශ අනාවරණය කරගත්තේය. මෙම ගුවන් ගමන් බලපත්රයට සහ බූරු මූණාගේ සැබෑ ගුවන් ගමන් බලපත්රයට විමර්ශන අංශ විසින් රටින් පිටවී යා නොහැකි සේ අධිකරණයෙන් වාරණ නියෝගයක් ගෙන තිබිණි. පසුගිය 24 වැනිදා බූරු මූණා ආගමන විගමන නිලධාරීන්ගේ අත්අඩංගුවට පත්වන්නේ ඒ පසුබිමේ දීය.
නායක ශ්රමණයා සහ කුඩු ලලිත්ගේ ඇයිහොඳැයිය
ශ්රී ජය ලංකාරාම විහාරස්ථානයේ විහාරාධිපති පොත්තේවෙල ඉන්ද්රසාර (38) නැමැති ශ්රමණයාගෙන් ප්රශ්න කිරීමේ දී ඔහු පවසා ඇත්තේ මහා පරිමාණ කුඩු ජාවාරම් කරුවෙක් මෙන්ම බූරු මූණා යොදවා හංවැල්ල ආපනශාලා හිමිව ඝාතනය කළ අපරාධකරු වූ ලලිත් කන්නංගර කුඩා අවධියේ සිට ඔහුගේ සමීප හිතවතෙක් බවය.
කුඩා අවධියේ හොරණ පිරිවෙණක අධ්යාපනය ලබද්දී ලලිත් කන්නංගරත් මේ ශ්රමණයාත් එක පන්තියේ අධ්යාපනය ලැබූ බවත් ඔහු එදා සිට දීර්ඝ කාලයක් තිස්සේ ලලිත් සමග ඇසුරු කළ බවත් මේ ශ්රමණයා පවසා තිබේ.
චීවරධාරියා කියා ඇත්තේ ලලිත්ගේ මිතුරෙක් රට යන්නට පැමිණ ගුවන්තොටුපල පොලිසිය මගින් අත්අඩංගුවට ගෙන ඇති බවත් ඔහු ගැන බලන්නට යැයි ලලිත් ඩුබායි සිට කී නිසා තමන් කටුනායක පොලිසියට පැමිණි බවත්ය.
මූලික විමර්ශනවලින් හෙළිවන්නේ මේ ශ්රමණයාට කුඩු ලලිත් මත්කුඩු අලෙවි කළ මුදලින් විශාල වශයෙන් මුදල් අධාර කර ඇති බවත් මෙම ශ්රමණයාත් කුඩු ලලිත්ගේ අපරාධවලට ආධාර අනුබල දෙන්නේ යැයි පෙනී යන බව බවත්ය. ඩුබායි සිටින ලලිත් කන්නන්ගර නැමැති මත්කුඩු ජාවාරම්කරු මත්කුඩු ජාවාරමේ නිරතව සිටින්නේ රත්ගම විදුර සහ හරක් කටා නැමැති ප්රබල මත්කුඩු ජාවාරම්කරුවන්ගේ ජාලයට සම්බන්ධව බව විමර්ශන වලින් පෙනී ගොස් ඇත.
කටුනායක ඕඅයිසී ගේ සහ ශ්රමණයාගේ සංවාදය
මෙම ශ්රමණයා තවත් ශ්රමණයෙක් සහ කුඩා සාමනේර භික්ෂුවක් සමග කටුනායක පොලිස් ස්ථානයට පැමිණ ඇත්තේ රාත්රී 09ට පමණ බවත් පැමිණ කටුනායක පොලිස් ස්ථානාධිපති ප්රධාන පොලිස් පරීක්ෂක ජනක සේනාධීර සමග දීර්ඝ වේලාවක් සාකච්ඡා කරමින් සිටි බවත් හෙළි වී ඇත.
අනතුරුව මෙම ශ්රමණයා පොලිස් ස්ථානයේ දීම ඩුබායිහි සිටි ලලිත් කන්නංගර නැමැත්තා සමග සංවාදයක යෙදී ඇතැයි වාර්තා වේ. අනතුරුව බූරු මූණාට ආහාර පාර්සලයක් ද මෙම ශ්රමණයා විසින් ගෙනත් දී ඇත.
ඔහු පිටවී ගොස් ඇත්තේ ඉන් අනතුරුවය. දැනට මූලික විමර්ශනවල දී හෙළිවන තොරතුරු අනුව පොලිසිය සැක කරන්නේ මේ බූරු මූණා පොලිසියෙන් පලා යෑම සඳහා රුපියල් කෝටි පහකට වැඩි මුදලක් හුවමාරු වී ඇත් බවත් එම මුදල පොලිසියට ගෙනැවිත් දී ඇත්තේ මෙම ශ්රමණයා විසින් බවත්ය.
කෙසේ වෙතත් සාමාන්ය අපරාධකරුවෙකුගෙන් ප්රශ්න කරන ආකාරයට මෙම ශ්රමණයින්ව ප්රශ්න කළ නොහැකි වීම නිසා දැනට සිදුවී ඇත්තේ ඔවුන් කියන දේ අසා සිටීමට බවත් මෙම මුදල් ගනුදෙනුව පිළිබඳ කතාව ශ්රමණයින් විසින් පිළිගන්නේ නැති බවත්ය.
බස්නාහිර පළාත් දකුණ දිසා අපරාධ කොට්ඨාසය වැඩිදුර විමර්ශන පවත්වයි.
