ලෝක අවධානයට ලක් වූ බිහිසුණු ඛේදවාචකයක්වුන කොත්මලේ, ගැරඬිඇල්ල අනතුර සම්බන්ධයෙන් සොයා බැලීම සඳහා ජ්යෙෂ්ඨ නියෝජ්ය පොලිස්පති අජිත් රෝහණ ගේ ප්රධානත්වයෙන් යුත් විශේෂ කමිටුවක් පත්කර තිබේ.
වැඩබලන පොලිස්පති ප්රියන්ත වීරසූරිය මහතාගේ උපදෙස් පරිදි පත් කළ මෙම කමිටුවට තවත් ජ්යෙෂ්ඨ පොලිස් නිලධාරීන් සිව්දෙනෙකු ඇතුළත් බව පොලීසිය පවසයි.
අදාළ කමිටුව මගින් අනතුරට හේතු වූ කරුණු සම්බන්ධයෙන් මූලික පැතිකඩයන් කිහිපයක් ආවරණය වන පරිදි විමර්ශන සිදු කිරීමට නියමිත බවත්, ඉදිරියේදී මෙවැනි අනතුරු වළක්වා ගැනීම සඳහා ශ්රී ලංකා පොලිසියට ගත හැකි ක්රියාමාර්ග පිළිබඳ යෝජනා ඉදිරිපත් කෙරෙනු ඇති බවත් පොලිසිය නිවේදනය කරයි.
පොලිස්පතිවරයාගේ නියමයෙන් මෙම කමිටුව පත් කරන්නේ සිද්ධිය සම්බන්ධයෙන් විශේෂ කමිටුවක් හරහා කෙරෙන පුළුල් විමර්ශනයට අමතරවය.
මේ වන විට නුවරඑළිය ප්රධාන මෝටර් රථ පරීක්ෂකවරයා වන ජාලිය බණ්ඩාර විසින් අනතුර සිදු වූ ස්ථානයේ මූලික ස්ථානීය පරීක්ෂණය සිදුකර තිබේ. එහිදී අනතුරට පෙර බස්රථයේ තිරිංග භාවිත කළ බවට සළකුණු දක්නට ලැබී නැති අතර එහිදී දුනුකොල කැඩී යාමක් හෝ වෙනත් කාර්මික දෝෂයක් නිසා මේ අනතුර සිදු වී ඇති බවට හඳුනාගෙන නැත.
ඒ අනුව බස් රථයේ ප්රමාණය ඉක්මවූ පිරිසක් ගමන් කිරීම, අධික වෙහෙස හේතුවෙන් රියදුරුට නින්ද යාම අනතුරට හේතුවන්නට ඇති බවට සැකපළ කෙරෙන බව නුවරඑළිය දිස්ත්රික් ප්රධාන මෝටර් රථ පරීක්ෂක ප්රකාශ කර ඇත. මේවනවිට වාර්තා වන පරිදි මෙම අනතුර සිදුවන අවස්ථාවේදී බස් රථයේ මගීන් 75 දෙනෙකුට අධික පිරිසක් ගමන් කරමින් සිට තිබේ.
කතරගම ඩිපෝ අධිකාරී එස්.ඒ.ඩි. තුසිත චාමින්ද ප්රකාශ කර ඇත්තේ අනතුරට පත්වූ ලංගම බස් රථයේ රියැදුරු ලෙස කටයුතු කළ ‘රියැදුරු මහතා වසර 15 කට ආසන්න කාලයක් සේවය කළ අයෙකු’ බවයි.
”මේ බස් එකට කතරගම ඉදලා කුරුණෑගල එන්නේ. ඒ වැල්ලවාය, බෙරගල, හපුතලේ, බණ්ඩාරවෙල, වැලිමඩ, නුවරඑළිය, ගම්පොළ, නුවර ඉදලා කුරුණෑගලට එන්නේ. මේ රූට් එකට යන්න පැය 9යි මිනිත්තු 30ක කාලයක් යනවා.”
”ඒ වගේම මේ බස් එකේ රියැදුරු විදිහට කටයුතු කරපු රියැදුරුවරයා අවුරුදු 15ක සේවයක් තියෙන කෙනෙක්. ඒ වගේම ඒ කෙනා මේ කතරගම-කුරුණෑගල මාර්ගයේ අවුරුදු 04ක ඉදලා වැඩ කරන කෙනෙක්.” ඔහු පවසා තිබිණි.
