ඊයේ කුළුගම්මන කුරුඳුගහමඩ ප්රදේශයේදී මාර්ගයෙන් ඉවතට විසිවී වංගුවකින් පහළට ඇදවැටී සිදුවූ බස් රථ අනතුරින් පුද්ගලයින් 38 දෙනෙක් තුවාල ලබා ඇති බව පොලිසිය පවසයි.
කුරුණෑගල ගල්ගමුවේ සිට වන්දනා නඩයක් රැගත් මෙම බස් රථය වෙසක් පොහොය දා උදෑසන දළදා මාළිගාවට ගොස් වන්දනා කර අනතුරුව ගඩලාදෙණිය සහ ඇම්බැක්කේ පූජනීය ස්ථානයන් වැඳ පුදාගෙන නැවත කුරුණෑගල බලා පැමිණෙන ගමනේ දී බස් රථය මෙම අනතුරට ලක් වී තිබේ.
වෙසක් දිනයේ රාත්රියේ දී මහනුවරට එක්වන විශාල ජන ගඟ හේතුවෙන් ප්රධාන මාර්ග අවහිර වන නිසා පොලිසියේ උපදෙස් මත කුරුණෑගල පුත්තලම මාර්ගයට පිවිසීම සදහා ගන්නෝරුවේ දී හල්ලොලුව හරහා කටුගස්තොට මාර්ගයේ පැමිණ යටිගහල මාර්ගයෙන් බරිගම හල්ලොලුව මාර්ගය ඔස්සේ කුරුණෑගල පුත්තලම මාර්ගයට පිවිසීම සඳහා පැමිණි බව රියදුරු ප්රකාශ කර තිබේ.
මෙම පටු පාර ඔස්සේ පැමිණෙද්දී කුරුඳුගහමඩ ප්රදේශයේ දී මෙම අනතුර සිදුවී ඇත්තේ බස් රථයේ තිරිංගවල ඇති වූ දෝෂයක් නිසා බව ද රියදුරු පොලිසියට දන්වා ඇත. අනතුර සිදුවන අවස්ථාව වනවිට බස් රථයේ 39 දෙනෙක් ගමන් කර ඇති අතර ඉන් 38 දෙනෙක් තුවාල ලබා තිබේ. තුවාල ලැබූවන් අතර වයස අවුරුදු 15ට අඩු දරුවන් 05 දෙනෙක් සිටින බව පොලිසිය කියයි.
අනතුර සිදුවූ අවස්ථාවේ දී අනතුරට පත් පිරිස් මුදවා ගැනීම සඳහා මැදිහත් වී ඇත්තේ දන්සලකට සහභාගී වී යළි පැමිණෙන තරුණයින් පිරිසකි. ඔවුන් පවසා තිබුණේ සිද්ධිය පිළිබඳ පොලිසියට සහ 1990ට දැනුම් දීමෙන් පසු ඔවුන් එම ස්ථානයට පැමිනීමට අනතුර සිදුවී පැය එක හමාරක් පමණ ගතවූ බවය.
ජීවිත හානි වාර්තා නොවන අතර අත් පය බිඳි යෑමෙන් බරපතල ලෙස තුවාල ලද පිරිසක් තුවාල කරුවන් අතර සිටින බව වාර්තා වේ.
තුවාල ලද පුද්ගලයින් බරිගම, මහනුවර සහ පේරාදෙණිය රෝහල්වලට ඇතුළු කර තිබේ. ගැරඬිඇල්ල මාරක අනතුරින් මේ වනවිට තුවාල ලබා නේවාසිකව ප්රතිකාර ලබමින් සිටින පිරිස 54කි. ඊයේ 38ත් සමග එම බස් රථ දෙකේ අනතුරුවලින් පමණක් ප්රතිකාර ලබන පිරිස 92කි. වැලිමඩ අනතුරින් තුවාල ලැබූ පිරිසත් සමග දින හතරක් තුළ බස් රථ අනතුරුවලින් අනතුරට පත්ව තුවාල ලැබූ පුද්ගලයින් ගණන 115ක් ඉක්මවා ඇත. දැනට මරණ 23කි.
