බ්රසීලයේ වාර්තා වූ ප්රචණ්ඩ ක්රියා සහ 2022 වසරේ ශ්රී ලංකාවේ පැවැති ආණ්ඩු විරෝධී උද්ඝෝෂණ අතර සමානකම් පෙන්වා දෙමින් ජනාධිපති රනිල් වික්රමසිංහ විසින් නිකුත් කර ඇති නිවේදනය සමාජ ක්රියාකාරීන් බොහෝ දෙනෙකුගේ දැඩි විවේචනයට ලක් වී තිබේ.
බ්රසීලයේ අන්ත දක්ෂිණාංශික හිටපු ජනාධිපති ජෙයාර් බොල්සොනාරෝගේ මැතිවරණ පරාජය පිළිගැනීම ප්රතික්ෂේප කරන ඔහුගේ ආධාරකරුවන් ඉරිදා (08) බ්රසීලියා අගනුවර ජනාධිපති මන්දිරයට, කොංග්රසයට සහ ශ්රේෂ්ඨාධිකරණයට කඩා වැදීම ශ්රී ලංකාවේ ඇතිවූ අරගලයට සමාන කරමින් ජනාධිපතිවරයා මෙම නිවේදනය නිකුත් කර තිබිණි.
සිද්ධිය සම්බන්ධයෙන් අදහස් දැක්වූ ජනාධිපති වික්රමසිංහ බ්රසීලියා ප්රදේශයේ මෑතක දී ඇති වූ ප්රචණ්ඩත්වය පිළිබඳව තමන් දැඩි කනස්සල්ලට පත්ව සිටින බව ප්රකාශ කළේය.
ව්යවස්ථා විරෝධී ක්රම මගින් ප්රජාතන්ත්රවාදී ව්යුහයන් පෙරලා දැමීමේ කණ්ඩායම් විසින් එවැනිම උත්සාහයන් ශ්රී ලංකාවද නොබෝ කලකට පෙර අත්දුටුව බව ඔහු කීවේය.
එවැනි එදිරිවාදිකම් හෙළා දකින බවත්, ගැටුමේ මෙම පැයේදී ශ්රී ලංකාව බ්රසීලයේ ජනාධිපතිවරයා, රජය සහ ජනතාව සමඟ සහයෝගයෙන් සිටින බවත් ජනාධිපති රනිල් වික්රමසිංහ වැඩිදුරටත් පැවසීය.
“ප්රජාතන්ත්රවාදයට සහ එහි ආයතනවලට සියලූ පුරවැසියන් විසින් විශ්වීය වශයෙන් ගරු කිරීම අත්යවශ්ය කරුණක්” යැයි ජනාධිපති වික්රමසිංහ කීවේ එසේය.
කෙසේ වෙතත්, ශ්රී ලංකාවේ අරගලය බ්රසීල විරෝධතාවලට සමාන කළ හැක්කේ කුමණ පදනමකින්දැයි මේ වනවිට සමාජ ක්රියාකාරීහු ජනාධිපතිවරයාගෙන් ප්රශ්න කරමින් සිටිති.
බ්රසීලයේ ඇති වී තිබෙන්නේ 2021 දී හිටපු ඇමරිකානු ජනාධිපති ඩොනල්ඩ් ට්රම්ප්ගේ ආධාරකරුවන් විසින් වොෂින්ටන් ඩීසී හි එක්සත් ජනපද කැපිටල් ගොඩනැගිල්ලට කඩා වැදීමට සමාන කැරැල්ලක් මිස ලංකාවේ ඇතිවුනාක් බඳු ජන අරගලයක් නොවන බව ඔව්හු කියති.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
අරගලය ජනතා ව්යාපාරය බ්රසීලයේ කැරලි සමඟ සංසන්දනය කිරීම එම ජනතා නැගිටීමට නිග්රහ කිරීමක් බව ඔවුහු පවසති.
