මනම්පිටිය නිමල් ජයරත්න –
බස් ගාස්තුවට රුපියලක මුදලක් අඩුවෙන් ලබාදීම නිසා අවුරුදු 72 වයසෙ පසු වන වකුගඩු රෝගියෙකුට අද( 05) දහවල් පොලොන්නරුව ඩිපෝවට අයත් බස් රථයක් තුළ දී කොන්දොස්තරවරයෙකු විසින් පහරදීමෙන් එම රෝගියා පොලොන්නරුව මහ රෝහලට ඇතුළත් කර තිබේ.
පොලොන්නරුව මහ රෝහලට රෝගියා ඇතුළත් කරීමෙන් පසු එම සිද්ධිය පිළිබඳව තරුණයෙක් පොලිසියට පැමිණිල්ලක් ඉදිරිපත් කිරීම නිසා අදාල කොන්දොස්තරවරයා අත්අඩංගුවට ගැනීමට පොලොන්නරුව පොලිසිය කටයුතු කර ඇත.
කොන්දොස්තරවරයාගෙන් මෙලෙස පහර කෑමට ලක්ව ඇත්තේ, දිඹුලාගල නුවරගල අංක 90. පිහිටිවැව ලිපිනයේ පදිංචි ඒ. සයිමන් නැමැති 72 දී සිව් දරු පියෙකි.
ඔහුගේ බිරියට දෑස් නොපෙනෙන අතර ඔහු තනිව වකුගඩු රෝගය සඳහා බෙහෙත විදගැනීමට පොළොන්නරුව වකුගඩු රෝහලට යෑමට බසයට ඇත. බස් ගාස්තුව ලබාදීමේ දී රුපියලක් අඩු බව කී කොන්දොස්තරවරයා මෙම වියපත් මිනිසාට පහර දී ඇත.
ඔහු කදුරුවෙල සිට වකුගඩු රෝහල් සඳහා ගමන් කිරීමට රුපියල් 30 ක මුදලක් කොන්දොස්තරවරයාට ලබාදී ඇත. රුපියලක් අඩු නිසා කොන්දොස්තරවරයා පරුෂ වචනයෙන් බැන මෙම වියපත් මිනිසාට පහර දුන් බවත් එම පහරදීම් වීඩියෝ ගත කළ තරුණයෙකුගේ ජංගම දුරකථනයද කොන්දොස්තරවරයා විසින් උදුරා ගෙන ඇති බවත් තරුණයා පොලිසියට පැමිණිලි කර අතැයි පරීක්ෂණ සිදුකරන පොලිසිය පවසයි.
පහර දෙන සිද්දිය ජංගම දුරකථනයෙන් වීඩියෝ ගතකර හා ඇසින් දුටු පොලොන්නරුව නවනගරය 87 /58 ලිපිනයේ පදිංචි 27 වියති ඒස්.ඒ අසංක රුක්මල් යන අය විසින් එම පහර කෑ වකුගඩු රෝගියා රෝහල් ගතකර පොලිසියට පැමිණිලි කර ඇත.
පහර කෑ වකුගඩු රෝගියා පොළොන්නරුව මහ රෝහලේ 12 වාට්ටුවේ ප්රතිකාර ලබන බවද රෝහල් ප්රකාශකයෙකු සඳහන් කළේය.
අප මෙම පහරදීම් පිළිබඳව අදාල 30 ශ්රි 3484 බස් රථයේ කොන්දොස්තරවරයා වන එච්. එම්. සමන් දයාගෙන් දුරකථනයෙන් කළ විමසීමේදී සඳහන් කළේ පහරදීමක් සිදු නොකළ බවත්,තමන් පොලිසියේ සිටින බැවින් උත්තර ලබා දිය නොහැකි බවයි.
අනතුරුව අප පොලොන්නරුව ඩිපෝ අධිකාරි ජී.ආර්. ජයතිස්සගෙන් ඒ පිළිබඳ දුරකථනයෙන් කළ විමසීමකදී ඔහු සඳහන් කළේ පහරදීමක් ගැන හදිසි දුරකථන අංකය මගින් තමාව දැනුවත් කර ඇති බවත්, අදාළ කොන්දොස්තරවරයා පොලොන්නරුව පොලිසියට යොමු කර තම ආයතනය මගින් ඒ පිළිබඳ පරීක්ෂණයක් සිදු කරන බවත්ය.
