බංග්ලාදේශයේ ජාත්යන්තර අපරාධ විනිශ්චය සභාව හිටපු අගමැතිනි ෂෙයික් හසීනාට අද (17) සවස මරණ දඬුවම නියම කළේය.
පසුගිය වසරේ ශිෂ්ය නායකත්වයෙන් යුත් විරෝධතාවලට ඇගේ රජය ප්රචණ්ඩ ලෙස පහර දීම සම්බන්ධයෙන් මනුෂ්යත්වයට එරෙහි අපරාධ සම්බන්ධයෙන් ඇයට එල්ල වූ චෝදනා සාධාරණ සැකයෙන් ඔබ්බට ඔප්පු වී ඇති බව එම විනිශ්ඡයාධිකරණය අද තීන්දු කළේය.
ඇයට චෝදනා තුනක් මත මරණ දඬුවම නියම වී තිබිණි..
ඒ විරෝධතාකරුවන්ට එරෙහිව ඩ්රෝන යානා, හෙලිකොප්ටර් සහ මාරාන්තික අවි යෙදවීමට නියෝග කිරීම සහ “ඇගේ නියෝගය අනුව” ඩකාහි චන්කර්පුල් සහ සාවාහි අෂුලියාවල විරෝධතාකරුවන් 12 දෙනෙකු ඝාතනය කිරීමය.
අධිකරණය ඇයට තවත් චෝදනා තුනක් මත මරණය දක්වා වෙනම සිර දඬුවමක් ද නිකුත් කළේය.
එනම් විරෝධතාකරුවන්ට එරෙහිව පෙළඹවීම, ඔවුන් මරා දැමීමට නියෝගයක් නිකුත් කිරීම සහ අපරාධ වැළැක්වීමට සහ අපරාධකරුවන්ට එරෙහිව දඬුවම් කිරීමට අපොහොසත් වීම ය.
දැනට පලා ගොස් සිටින 78 හැවිරිදි හසීනා උක්ත නඩු විභාගයට පෙනී නොසිටි අතර ඇය නොමැතිව නඩු විභාගය පැවැත්විනි. පසුගිය වසරේ මහජන විරෝධතා මර්දනය පිටුපස සිටි මහ මොළකරු ලෙස සහ ඛේදවාචාකයේ නිර්මාණ කරු ලෙස හසීනා චෝදනා ලැබ සිටියාය. මෙම කැරැල්ලේ දී පුද්ගලයින් 1,400 ක් පමණ මිය ගියේය.
හසීනාට අධිකරණය මරණ දඬුවම නියම කරන විට අධිකරණ ශාලාවේ සිටි අය ඔල්වරසන් දෙමින් අත්පොළසන් දෙන ආකාරය සජීවී දර්ශනවලින් පෙනුණි.
හිටපු ස්වදේශ කටයුතු ඇමතිටත් මරණ දඬුවම
හිටපු ස්වදේශ කටයුතු අමාත්ය අසාදුස්සාමාන් ඛාන්ට ද මරණ දඬුවම නියම විය.
බංග්ලාදේශයේ විශේෂ විනිශ්චය සභාව හිටපු ස්වදේශ කටයුතු අමාත්ය අසාදුස්සාමාන් ඛාන් කමල්ට මනුෂ්යත්වයට එරෙහි අපරාධ සම්බන්ධයෙන් එම දඬුවම නියම කළේය.
එම විනිශ්ඡයාධිකරණය හිටපු පොලිස් ප්රධානී අල්-මාමුන්ට වසර පහක සිර දඬුවමක් නියම කර තිබිණි.
“නිවැරදි තීරණයකට එළඹීම සඳහා විනිශ්චය සභාවට ද්රව්යමය සාක්ෂි” ඇතුළුව නඩු විභාගයට අවශ්ය සහාය ලබා දීම වෙනුවෙන් චෞද්රි අබ්දුල්ලා අල්-මාමුන්ට සහනයක් ලබා දෙන බව අධිකරණය කීවේය.
හසීනාගේ ප්රතිචාරය –
“තත්වය පාලනය කර ගැනීමට අපට නොහැකි විය, නමුත් සිදුවූ දෙය පුරවැසියන්ට එරෙහිව කලින් සැලසුම් කළ ප්රහාරයක් ලෙස විස්තර කළ නොහැකියි.” හසීනා පවසන බව රොයිටර් පුවත් ඒජන්සිය වාර්තා කර තිබිණි.
AFP වෙත ඇය කරන ලද ප්රකාශයක තමන්ට එරෙහි තීන්දු “දේශපාලනික වශයෙන් අභිප්රේරිත” එකක් ලෙස ඇය හැඳින්වූවාය.
“මට එරෙහිව ප්රකාශයට පත් කරන ලද තීන්දු ප්රජාතන්ත්රවාදී ජනවරමක් නොමැති තේරී පත් නොවූ රජයක් විසින් ස්ථාපිත කර සභාපතිත්වය දරන ලද දූෂිත විනිශ්චය සභාවක් විසින් ලබා දී තිබෙනවා. ඒවා පක්ෂග්රාහී සහ දේශපාලනික වශයෙන් අභිප්රේරිත යි.” හසීනා කීවාය.
ඉන්දියාවේ ප්රතිචාරය කුමක් විය හැකි ද?
ශෙයික් හසීනා දැනට පලාගොස් සැඟව සිටින්නී ඉන්දියාවේ ය.
ඉන්දියාවේ ජින්ඩාල් ගෝලීය විශ්ව විද්යාලයේ දකුණු ආසියානු අධ්යයනයන් පිළිබඳ විශේෂඥ මහාචාර්ය ශ්රී රාධා දත්තා, අල් ජසීරාට පවසන්නේ හසීනාට එරෙහිව අධිකරණයේ තීන්දුව අපේක්ෂා කළ නමුත් ඉන්දියාවේ රැකවරණය ලබන හිටපු බංග්ලාදේශ අගමැතිනිය පිටුවහල් නොකරන්නේ යැයි තක්සේරු කළ හැකි බවය.
“මේ තියන පසුබිම ඇතුළේ කිසිම තත්වයක් යටතේ ඉන්දියාව ඇයව පිටුවහල් කිරීමට යන්නේ නැති බව විශ්වාසයි,” ඇය පැවසුවාය.
“රටේ මනෝභාවය දුටුවා. හැමෝම බලාපොරොත්තු වුණේ තරමක් දැඩි නඩු විභාගයක් ඇය වෙත පැමිණෙන බවයි,” ඇය පැවසුවාය. බංග්ලාදේශයේ විනිශ්චය සභාවේ ක්රියාමාර්ග රටේ නීති පද්ධතිය අනුගමනය කළ බවට ජාත්යන්තර මානව හිමිකම් නිරීක්ෂකයින් එකඟ වන බව ද ඇය කීවාය.
“නිරායුධ සිසුන්ට එරෙහිව සිදු කරන ලද අපරාධ පිළිබඳව කිසිවෙකුට කිසිදු සැකයක් නෑ. අගමැති වෙඩි තැබීමට සෘජු නියෝග කළ බවට සාක්ෂි තිබෙනවා,” දත්තා පැවසීය.
“අවාමි ලීගය ප්රති-ආඛ්යානයක් ගොඩනැගීමට උත්සාහ කරනු ඇති… නමුත් බොහෝ දුරට, හසීනා විසින් මනුෂ්යත්වයට එරෙහි අපරාධ සිදු කරන ලද බව බංග්ලාදේශ ජාතිකයින් විශ්වාස කරනවා.” ඇය කීවාය.
