පෝලිම්වලට යනවිට වතුර බෝතලයක් අරගෙන යන ලෙස ශ්රී ලංකා වෛද්ය සංගමයේ සභාපති මහාචාර්ය සමන් ධර්මරත්න ජනතාවගෙන් ඉල්ලීමක් කර තිබේ.
මහාචාර්යවරයා කියා සිටින්නේ පෝලිම්වල සිටින මේ ජනතාවට දන්සල් ලෙස හෝ ජලය ලබා දිය යුතු බවය.
බී.බී.සී. ලෝක සේවය කළ විමසීමකට පිළිතුරු දෙමින් මහාචාර්යවරයා පෙන්වා දෙන්නේ දැඩි අව්වට නිරාවරණය වීම නිසා විජලනය වීම මරණයට පත්වීමට පවා හේතු විය හැකි බව යි.
“ලොකුම ප්රශ්නය වතුර. අව්වේ හිටගෙන ඉන්නකොට ආවරණයක් නැහැ. අව්වෙදි විජලනය, නැත්නම් ඩීහයිඩ්රේෂන්, වෙන්න පුළුවන්.”
“ඒගොල්ලෝ වතුර බෝතලයක් අරන් යන්න ඕනේ. දන්සැල් වගේ වතුර ලබාදීමේ ක්රමයක් ක්රියාත්මක කරන්න ඕනේ. වාහනවල හිටියත් ඔය ප්රශ්නය වෙන්න පුළුවන්. එන්ජින් ඕෆ් කරලානේ තියෙන්නේ. AC දාල නැහැනේ,” මහාචාර්යවරයා කියා සිටියේ ය.
“ප්රධානම අවවාදය තමා, විජලනය වෙන්නේ නැතිවෙන්න වතුර බොන්න. යනකොට වතුර බෝතලයකුත් අරගෙන ගිහිල්ලා පුළුවන් තරම් වතුර බොන්න.”
“වෙනත් රෝගී තත්ත්වයක් නැති කෙනෙක්, නීරෝගී තරුණ අයෙක් වුණත් විජලනය හොඳ නැහැ. පුළුවන් තරම් වතුර බොන්න ඕනේ. සමහර අය වැසිකිළි – කැසිකිලි යන්න වෙයි කියලා වතුර බොන්නේ නැහැ. මාස්ක් එක ගලවන්න වෙන නිසා වතුර බොන්නේ නැහැ. නමුත් එය හොඳ දෙයක් නොවෙයි,”
ඔහු ප්රකාශ කළේ ය.
