“ගාල්ලේ හිත හොඳ පොලිස් මහත්තයා “ ලෙස හඳුන්වන සැරයන් වරයෙක් තමන්ට සිදුවී ඇති අසාධාරණය පොලිස් සහන මැදිරයෙනුත් ඉටු නොවුන පසු සමාජ මාධ්යය ඔස්සේ ප්රකාශකළ වරදට අද (23) සේවය අත්හිටුවිමට පොලිස් දෙපාර්තමේන්තු තීරණය කර තිබේ.
31 අවුරුද්දක් වූ ස්වකීය පොලිස් සේවා දිවියේ සිදුවූ පීඩාවන් දරාගෙන සිට කිසිම තැනකින් සාධාරණයක් ඉටු නොවන තැන මෙම පොලිස් සැරයන්වරයා සමාජ මාධ්ය ඔස්සේ ස්වකිය කතාව කීවේය.
2007.05.01 දින පොලිස් සැරයන්වරයෙක් දක්වා උසස්වීම් ලබන ඔහු 16 වසරක් සැරයන්වරයෙක්ව සිටිය දී තමන් සමග කොස්තාපල්වරුන් ලෙස පටන් ගත් නිලධාරීන් තරු තුන පැළඳ සිටි ආකාරය ගැනත්, දූෂණ චෝදනා සහිතව සිටි උප පොලිස් පරික්ෂකවරුන් ජ්යෙෂ්ඨ නියෝජ්ය පොලිස්පතිවරුන් දක්වා ඉහළට ගිය ගමනත් ගැන ඔහු වේදනාවෙන් කතා කළේය.
කුරුඳුවත්ත පොලිසියට අනුයුක්තව සේවය කරමින් සිටි පොලිස් සැරයන් 10412 විමල් ජයසේකර නැමැති මෙම නිලධාරියාගේ සේවය අත්හිටුවා ඇත්තේ නිසි අවසරයක් නොමැතිව ජූනි මස 17, 18, සහ 20 දිනයන්හි දි නිල ඇඳුමින් සැරසී ශ්රී ලංකා පොලිසියේ හොඳ නමට කැළලක් ඇතිවන අන්දමින් හා පොලිස් නිලධාරීන් කෙරෙහි මහජනතාව තුළ අප්රසාදයක් ඇතිවන අන්දමින් සමාජ මාධ්යයන් වෙත වීඩියෝ පටයක් මුදාහැරීමේ “විෂමාචාර ක්රියාවෙහි”” නිරත වීම නිසාය.
මෙම සැරයන්වරයාගේ වැඩ තහනම් කර තිබුණේ කුරුඳුවත්ත ප්රදේශය භාර සහකාර පොලිස් අධිකාරීවරයා විසිනි.
පහළ නිලධාරීන්ගේ අතෘප්තිය එන්න එන්නම වැඩිවෙමින් ඇති බවත් මේ වනවිට සතියට නිලධාරීන් 10 දෙනෙකුවත් පොලිස් සේවය අත්හැර යන බවත් පොලිස් මූලස්ථානයේ ආරංචි මාර්ග පවසයි.
රැකියා තෘප්තිමත් භාවයක් නැතිකම. නිසි කලට උසස්විම් නොමැති වීම, සේවයට සරිලන වැටුපක් නොලැබීම, රාජකාරියේ යෙදෙන පහළ පොලිස් නිලධාරීන්ගේ බැරැක්කවල මූලික පහසුකම්වත් නොමැති තත්ත්වයක් ඇතිවී තිබීම මේ හැරයාම්වලට හේතු බව අභ්යන්තර තොරුතුරු හෙළි කරයි.
