මනම්පිටිය නිමල් ජයරත්න-
රජයෙන් පොරොන්දු වු රුපියල් දස දහසක මුදල මෙතෙක් තමන්ට ලබානොදුන් බවට පවසා ඊට විරෝධය පළ කරමින් මහවැලි බී කලාපයේ දිඹුලාගල කොට්ඨාසයේ ගොවි සංවිධාන රැසක ගොවි නියෝජිතයින් හා ගොවීන් පිරිසක් අද (24) දහවල් මනම්පිටිය ප්රාදේශීය ගොවිජන සේවා මධ්යස්ථානය වටලා ගොවීන් කිහිපදෙනකු මධ්යස්ථානයේ වහළය මතට ගොඩවී විරෝධතාවයක නිරත වූහ.
මෙම විරෝධතාවය සඳහා මනම්පිටිය, නැගෙනහිර මනම්පිටිය, දළුකාන, කුඩාවැව, දිඹුලාගල නවමිල්ලාන ඇතුළු ගොවි සංවිධාන කිහිපයක ගොවීන් තුන්සීයකට අධික පිරිසක් එක්ව සිටියහ.
ඔවුන් ගොවිජන සේවා ප්රාදේශීය මධ්යස්ථානය වටලා පැයතුනක පමණ කාලයක්, ගොවිජන සේවා ප්රාදේශීය සංවර්ධනය නිලධාරිවරයා එනතෙක් එහි නිලධාරීන් නිවාස අඩස්සියටද ගනු ලැබූහ,
දිඹුලාගල කොට්ඨාස ගොවි සංවිධාන සභාපති උෂාන් වික්රමසූරිය මෙහිදී සඳහන් කළේ තම කොට්ටාසයේ ගොවීන් විශාල පිරිසකට රුපියල් දස දහසක මුදල මෙතෙක් ලැබී නොමැති බවය.
එමෙන්ම රතුකුඩු ලබාගැනීම සඳහා රජය මගින් වෙන් කරන ලද එම මුදල නොලැබීම නිසා තමන්ට වී වගාවට අවශ්ය රතුකුඩු ඉසීමට නොහැකි වූ නිසා දිලීර රෝග රැසක් හටගැනීමෙන් වී අ ස්වනු විශාල වශයෙන් පහළ බැස ඇති අයරුත් ඔවුහු පෙන්වා දුන්හ.
විරෝධතාවයේ නිරත ගොවින් මෙහිදී සඳහන් කළේ තමන්ට රුපියල් දස දහසක් මුදල සහ චීනය රජය මගින් ලබාදුන් ඩීසල් සහනාධාරය කඩමින් ලබාදීමට පොරොන්දුවක් ලබාදෙන තුරු මෙම විරෝධතාවය අඛණ්ඩව සිදුකරන බවත් වහලෙන් නොබසින බවත්ය.
පැය කිහිපයක් ගොවීන් විරෝධතාවය නිරතවන අතරතුර මෙම ස්ථානයට පැමිණි මනම්පිටිය ගොවිජන සේවා සංවර්ධන නිලධාරී සුබෝධ බණ්ඩාර ගොවිජන සේවා දෙපාර්තමේන්තුවේ ඉහළ නිලධාරියෙක් දුරකථනය මගින් සම්බන්ධ කරගනිමින් සඳහන් කළේ මේ මස 28 වෙනිදාට ගොවීන් 267 දෙනෙකු සඳහා අදාල රුපියල් 10,000 මුදල ගිණුම්වලට බැර කරන බවය.
එම පොරොන්දුවත් සමග ගොවීන් සඳහන් කළේ මේ මස 28 වෙනිදා සවස තුනවන විට තම ගිණුම්වලට මුදල් බැර නොවුණහොත් මීට වඩා ගොවීන් පිරිසක් පැමිණ ගොවිජන සේවා මධ්යස්ථානය වටලන බවය.
මනම්පිටිය පොලිස් ස්ථානය මගින් මෙම ස්ථානයට දැඩි ආරක්ෂාවද යොදවා තිබූ අතර ප්රාදේශීය සංවර්ධන නිලධාරිවරයා ලබාදුන් පොරොන්දුවත් සමඟ විරෝධතාවේ නිරත ගොවීන් විසිර ගියහ.
