පන්සලේ පින්කැටය කැඩීමට පැමිණි බව කියන පුද්ගලයෙකුට අමානුෂික ලෙස පහර දී ඝාතනය කිරීමේ චෝදනාව මත අත් අඩංගුවට ගත් ගැටඹේ දියකපනාතොට ශ්රී රක්ඛංග විහාරස්ථානයේ විහාරාධිපති හිමි සහ සිවිල් ආරක්ෂක භටයා මෙම මස 22 දින දක්වා රක්ෂිත බන්ධනාගාර ගත කිරීමට අධිකරණය නියෝග කර තිබේ.
ඝාතනය වූ පුද්ගලයා සමග පොරබැදීම නිසා තුවාල සිදුවී ඇතැයි කියමින් මේ වනවිට අත් අඩංගුවට ගත් සිවිල් ආරක්ෂක භටයා මහනුවර රෝහලට ඇතුළත් කර තිබේ.
මෙහිදී පැන නැගී ඇති එක් ඛේදවාචකයක් වන්නේ තම සැමියාගේ දේහය තබා ගැනීමට සිය කුලී නිවසේ ඉඩකඩ නොමැති බව කියමින් විහාරස්ථාන පරිශ්රයේ දී ඝාතනයට ලක් වූ පුද්ගලයා ගේ මළ සිරුර ඔහු ගේ බිරිය විසින් භාර ගැනීම ප්රතික්ෂේප කර තිබීමය. මෙම පුද්ගලයා සිය දෙවැනි විවාහයේ බිරිය සමග පදිංචි වී සිට ඇත්තේ හෙම්මාතගම අරකොටවැල්ල කුලී නිවසකය. මැණික්හින්නේ පදිංචි පලමු විවාහයේ බිරිය දන්වා ඇත්තේ මෙම පුද්ගලයා දැන් ඇයගෙන් දික්කසාද වී සිටින බවය.
මේ තත්ත්වය තුළ දේහය භාර ගැනීමට හිමිකරුවෙක් ඉදිරිපත් නොවීම හේතුවෙන් සිරුර රජයේ වියදමින් අවසන් කටයුතු කිරීම සදහා අධිකරණ නියෝග ලබා ගැනීමට පොලිසිය පියවර ගෙන තිබේ. .
මළ සිරුර පිළිබඳ පශ්චාත් මරණ පරීක්ෂණය මහනුවර ජාතික රෝහලේ දී අද (09) සිදු කිරීමට නියමිතව තිබිණි.
මහනුවර කොට්ඨාස ජ්යෙෂ්ඨ පොලිස් අධිකාරී අනුරුද්ධ බණ්ඩාරනායකගේ මෙහෙය වීම මත පොලිස් අධිකාරී එන්.ඉලංගකෝන්, මහනුවර පොලිස් මූලස්ථානාධිපති ප්රධාන පොලිස් පරීක්ෂක රසික සම්පත්ගේ උපදෙස් මත අපරාධ අංශයේ වැඩ බලනස්ථානාධිපති ප්රධාන පොලිස් පරීක්ෂක සුරේෂ් කුමාර ඇතුළු කණ්ඩායමක් සිද්ධිය සම්බන්ධයෙන් පරීක්ෂණ පවත්වති.
