කීර්ති ප්රනාන්දු –
පවතින අධික පෑවිල්ල බිත්තර නිෂ්පාදනයට ගැටලුකාරී තත්ත්වයක් මතුවී ඇතැයි සමස්ත ලංකා බිත්තර නිෂ්පාදකයින්ගේ සංගමයේ සභාපති ආර්.එම්. සරත් රත්නායක පවසයි.
මේ දිනවල පවතින දැඩි රස්නය හේතුවෙන් බිත්තර දමන කිකිළියන් අධික ලෙස ජලය පානය කරමින් කෑම අඩුවෙන් කෑම නිසා බිත්තර දැමීම සැලකිය යුතු මට්ටමකින් පහත බැසීම සිදුව ඇතැයි ඔහු කියයි. .
එසේම වැට් බදු වැඩිවීම හේතුවෙන් කුකුළු කෑම ,ඖෂධ, සහ විටමින් වර්ගවල මිලද ඉතා විශාල ඉහළ යාමත් බිත්තර නිෂ්පාදනයට දැඩි බලපෑමක් සිදුකරන බව ඔහු කීවේය.
මීට පෙර රුපියල් 38 කට නිෂ්පාදනය කළ බිත්තරයක් බදු වැඩිවීමත් සමඟ රුපියල් 43 දක්වා නිෂ්පාදන වියදම ඉහළ ගොස් ඇති බවද සරත් රත්නායක පෙන්වා දුන්නේය.
එසේම වෙළඳපොලේ එළවළු, මස්, මාළු, කරවල මිලද සීඝ්ර මිල ඉහළයාමක් සිදුවීම තුළ පාරිභෝගික ජනතාවගේ බිත්තර පරිභෝජනය වැඩි වූ බව පවසන ඔහු නිෂ්පාදනය අඩුවීම හා ඉල්ලුම වැඩිවීම තුළ බිත්තරයක මිලද ඉහළ යාමක් සිදුවූ බව පැවසීය .
කෙසේ වුවද මේ වන විට දිනකට බිත්තර ලක්ෂ 65 ත් 70ත් අතර ප්රමාණයක් නිෂ්පාදනය වෙමින් පවතින බවත් මාර්තු මස 15 වැනි දින පමණ වන විට බිත්තර මිල පවතින තත්ත්වයට වඩා අඩුවී බිත්තරයක් රුපියල් 50 අඩුවෙන් මිලදී ගැනීමට පාරිභෝගික ජනතාවට හැකිවනු ඇති බවත් සරත් රත්නායක වැඩිදුරටත් කීවේය.
