ඖෂධවල මිල වැඩිවීමක් නිවේදනය කරමින් සෞඛ්ය අමාත්යාංශය ඊයේ (29) මධ්යම රාත්රියේ සිට බලාත්මක වන පරිදි නිකුත් ඇති ගැසට් නිවේදනයත් සමග අත්යාවශ්ය ඖෂධ 60ක මිල සියයට 40කින් ඉහළ ගොස් ඇත.
විකිණීමේ කාර්යය සඳහා ගැසට් නිවේදනය මගින් උපලේඛනගත ඖෂධ සන්තකයේ තබාගෙන සිටින සෑම පුද්ගලයෙක් ආයතනයක් හෝ ඖෂධ අලෙවිසලක් විසින් උපලේඛනගත ඖෂධවල මිල, උපරිම සිල්ලර මිල හෝ මෙම ගැසට් නිවේදනයෙන් ප්රතිශෝධිත සිල්ලර මිල යන දෙකෙන් වඩාත් අඩු මිලෙහි පවත්වාගෙන යා යුතු බව ද එම නිවේදනයේ සඳහන් කර තිබේ.
මෙම ගැසට් නිවේදනයත් සමග ඇල්බෙන්ඩසෝල් හෙවත් පණු රෝගයට ලබාදෙන ඖෂධ, ඇමොක්සිලීන්, ක්ලැරිත්රෝමයිසීන්, ඇසිත්රෝමයිසීන්, සෙෆියුරොක්සිම් ආදී ප්රතිජීවක ඖෂධ ද, අත්යවශ්ය ඖෂධ ලැයිස්තුවට අයත් ඩොක්සිසයික්ලීන් හෙවත් ‘ලෙප්ටොස්ෆයිරෝසියාස්’ (මී උණ රෝගය), චිකන්පොක්ස් (පැපොල) රෝගය සඳහා ලබාදෙන ඇසික්ලොවීර් යන ඖෂධ ආදිය ඇතුළු තවත් ඖෂධ රැසක මිල ගණන් සංශෝධනයට ලක් වනු ඇත.
මෙම නව ඖෂධ මිල සංශෝධනය යටතේ ඖෂධ වර්ග 60ක මිල සියයට 40කින් ඉහළ යනු ඇත. නව ඖෂධ මිල සංශෝධනයට අනුව ඇස්ප්රින් මිලිග්රෑම් සියයේ පෙත්තක මිල රුපියල් 12 යි ශත 53 දක්වා ඉහළ යන අතර, මෙට්පෝමින් මිලිග්රෑම් 850 හේ පෙත්තක මිල රුපියල් 17 යි ශත 50 දක්වා ඉහළ ගොස් තිබේ.
එමෙන්ම නව සංශෝධනයට අනුව දියවැඩියා රෝගීන් සඳහා ලබාදෙන ඉන්සියුලින් සොලියුබල් හියුමන් මිලිලීටර දහයේ කුප්පියක මිල රුපියල් දෙදහස් හත්සිය දෙකයි ශත 41 ක් වනු ඇත.
එමෙන්ම නව ඖෂධ මිල සංශෝධනයට අනුව පැරසිටමෝල් මිලිග්රෑම් 500 යේ පෙත්තක මිල රුපියල් හතරයි ශත 16 දක්වා ඉහළ ගොස් තිබේ.
අදාල ගැසට් නිවේදනය මෙතනින් බලන්න… Drugs Gessert
