පාස්කු ඉරිදා ප්රහාර විමර්ශන කටයුතු ඉදිරියට නොයෑම සම්බන්ධව දේශපාලන ක්ෂේත්රයේ ඇතිවී ඇති සංවාදය විමසිය යුතු බව ශ්රී ලංකා නිදහස් පක්ෂයේ ජ්යෙෂ්ඨ උප සභාපති මහාචාර්ය රෝහණ ලක්ෂ්මන් පියදාස පවසයි.
“රටේ ආරක්ෂාව පිළිබඳ ප්රශ්නයක් ඇති කරන්න හිතා මතා ඇති කළ එකක් ද කියලා දැන් සැකයක් ඇති වෙලා තියනවා.“ ජ්යෙෂ්ඨ උප සභාපතිවරයා කියයි.
ආණ්ඩුවේ ප්රධාන හවුල්කාර පක්ෂයවන ශ්රී ලංකා නිදහස් පක්ෂය මේ ආණ්ඩුව දැනට මේ කරගෙන යන සම්පත් කොල්ලයට සපුරාම විරුද්ධ බව ද ඔහු අවධාරණය කරයි.
මහනුවර පැවති මාධ්ය අමතා ඔහු මෙසේ ද පවසා තිබිණි.
“ජාත්යාන්තර බලවේග රටේ කැරකෙන්න පටන් අරන් තියනවා. රටේ සම්පත් විකුණමින් ඉන්නවා. සිංගප්පූරුට උක් වගා ඉඩම් විකුණන්න යනවා. කොළඹ මර්මස්ථාන වෙන්දේසි කරන්න යනවා. යාපනය භූමිය වෙන්දේසි කරන්න ලෑස්ති වෙලා තියනවා. තෙල් ටැංකි ටික රටවල්වලට දෙන්න තීරණය කරලා තියනවා. ජනසතු කරපු වරායෙ ජැටි එක එක රටවල් භාර අරන් තියවා. ලංකාවෙ නැගෙනහිර වෙරළ බදු දෙන්න යනවා. රටේ සම්පත් බරපතල ලෙස විකිණීමේ තර්ජනයකට අලෙවි වීමේ තර්ජනයකට ගොදුරු වෙමින් තිබෙනවා. එක් පැත්තකින් ඇමරිකාව විදුලිබලාගාරවල අයිතිය පවරා ගන්න ලෑස්ති වෙලා තියනවා.“
“ශ්රී ලංකා නිදහස් පක්ෂය මේ සියලු දේට විරුද්ධයි“
මහාචාර්යවරයා පාස්කු ඉරිදා ප්රහාරය සම්බන්ධව මාධ්ය නැගූ ප්රශ්නයකට උත්තර දුන්නේ මෙසේය.
“පාස්කු ඉරිදා පරීක්ෂණය ඉස්සරහට යන්නෙ නැත්තෙ ඇයි. රටේ ආරක්ෂාව පිළිබද ප්රශ්නය හිතා මතා ඇතිකළ එක්ක බව දැන් දේශපාලන ක්ෂේත්රයේ කතාබහට ලක් වෙනවා. මේවා ගැන සොයා බලපු බුද්ධි නිලධාරීන් රට අත්හැරලා ගිහිල්ලා. සමහර සැකකරුවන් ලංකාවෙන් පැනලි ගිහින්. “ ඔහු කීවේය.
තමන් මේ ආණ්ඩුව පිහිටුවීම සඳහා එක් වන්නේ ඒ දේශපාලන වාතාවරණයතුළ ගත හැකි යහපත්ම පියවර ලෙස උවද මේ වනවිට තමන් සමග ආණ්ඩුව ඇති කරගත් කිසිම ගිවිසුමක්, එකඟතාවයක් හෝ තමන් වෙත ලබා දුන් දේශපාලන පොරොන්දුවක් ඉටු වී නැති බවත් ඔහු පැවසුවේය.
“අපි බොරුවට ලෝකයට පම්පෝරි ගහනවා. ජනතාව බරපතල අසහනයක. “ ඔහු කියන්නේ එසේය.
