පාස්කු ප්රහාරයෙන් විපතට පත්වූවන්ට ගෙවිය යුතු හිඟ වන්දි මුදල අගෝස්තු 30 වැනිදාට පෙර ගෙවන ලෙස ශ්රේෂ්ඨාධිකරණය අද (15) හිටපු ජනාධිපති මෛත්රීපාල සිරිසේනට නියෝග කළේය.
ශ්රී ලංකා හිටපු ජනාධිපති මෛත්රීපාල සිරිසේන අද (15) ශ්රේෂ්ඨාධිකරණයට දන්වා සිටියේ පාස්කු ප්රහාරයෙන් මියගිය අය වෙනුවෙන් ගෙවීමට නියම කළ රුපියල් මිලියන 100 ක වන්දි මුදලින් රුපියල් මිලියන 58ක් දැනටමත් ගෙවා ඇති බවය. ඉතිරි මුදල ගෙවීම සඳහා වසර හයක කාලයක් ලබා දෙන ලෙසත් ඔහු අධිකරණයෙන් ඉල්ලා සිටියේ ය.
2019 පාස්කු ඉරිදා ප්රහාරයෙන් මියගිය පුද්ගලයන්ට එක් අයෙකුට රුපියල් මිලියනයක් බැගින් වන්දිය ගෙවන ලෙස 2023 ජනවාරි 12 වැනි දින ශ්රේෂ්ඨාධිකරණය රජයට නියෝග කළේය.
එමෙන්ම 2019 පාස්කු ඉරිදා ප්රහාරය වැළැක්වීමට අපොහොසත් වීම සම්බන්ධයෙන් ඉදිරිපත් කර ඇති මූලික අයිතිවාසිකම් පෙත්සම්වල වගඋත්තරකරුවන් ආසන්න ප්රහාරයක් පිළිබඳ විශ්වසනීය තොරතුරු තිබියදීත් එය වළක්වා නොගැනීමෙන් පෙත්සම්කරුවන්ගේ මූලික අයිතිවාසිකම් කඩ කර ඇති බවද ශ්රේෂ්ඨාධිකරණය තීන්දු කළේය.
හිටපු ජනාධිපති මෛත්රීපාල සිරිසේන, හිටපු ආරක්ෂක ලේකම් හේමසිරි ප්රනාන්දු, හිටපු පොලිස්පති පූජිත් ජයසුන්දර, හිටපු ජාතික බුද්ධි සේවා ප්රධානී සිසිර මෙන්ඩිස් සහ හිටපු රාජ්ය බුද්ධි සේවා ප්රධානී නිලන්ත ජයවර්ධන මෙම පෙත්සම්වල වගඋත්තරකරුවෝ වූහ.
තවද හිටපු ජනාධිපති මෛත්රීපාල සිරිසේනට රුපියල් මිලියන 100 වන්දියක් ගෙවන ලෙසත් අධිකරණය නියෝග කළේය.
තවද හිටපු පොලිස්පති පූජිත් ජයසුන්දරට සහ හිටපු රාජ්ය බුද්ධි සේවා ප්රධානී නිලන්ත ජයවර්ධනට රුපියල් මිලියන 75 බැගින් වූ වන්දියක් ගෙවන ලෙසටත් හිටපු ආරක්ෂක ලේකම් හේමසිරි ප්රනාන්දුට රුපියල් මිලියන 50 ක වන්දියක් ගෙවන ලෙසත් අධිකරණය නියෝග කර තිබිණි. .
ජාතික බුද්ධි සේවයේ හිටපු ප්රධානී සිසිර මෙන්ඩිස්ට අධිකරණය නියම කළ වන්දිය රුපියල් මිලියන 10කි.
මෙම මුදල් සියල්ල එකතු කර 2019 පාස්කු ඉරිදා ප්රහාරයෙන් විපතට පත් වූවන්ට වන්දි ගෙවීම සඳහා යෙදවිය යුතු බව ශ්රේෂ්ඨාධිකරණය ප්රකාශ කළේය.
