කීර්ති ප්රනාන්දු –
පාස්කු ප්රහාරයට හිටපු ජනාධිපති මෛත්රීපාල සිරිසේන සම්පූර්ණයෙන්ම වගකිව යුතු බවත්, ඔහුට එරෙහිව නීතිය ක්රියාත්මක කළ යුතු බවත් සංචාරක සහ සිවිල් ගුවන් සේවා කැබිනට් අමාත්ය ප්රසන්න රණතුංග විසින් පසුගිය නොවැම්බර් 26 දා සිදුකළ ප්රකාශය පිළිබඳ අපක්ෂපාතී පුලුල් පරීක්ෂණයක් කරන මෙන් කොළඹ අගරදගුරු පදවි ජන සන්නිවේදන කේන්ද්රයේ අධ්යක්ෂ ජූඩ් ක්රිසන්ත ප්රනාන්දු පියතුමා විසින් අපරාධ පරීක්ෂණ දෙපාර්තමේන්තුවේ පැමිණිල්ලක් ගොනු කර තිබේ.
අද උදෑසන 10ට කතෝලික පියතුමන්ලා විසින් එම පැමිණිල්ල අපරාධ පරීක්ෂණ දෙපාර්තමේන්තුව වෙත භාරදෙනු ලැබීය.
රජයේ වගකිවය යුතු කැබිනට් ඇමතිවරයෙක් ප්රසිද්ධ මාධ්ය ඉදිරියේ එසේ ප්රකාශ කරන්නේ ඒ සඳහා ප්රබල සාධක තමන් සතුව තබාගෙන බව දැඩිව විශ්වාස කරන බවත්, හිටපු ආරක්ෂක ලේකම් හේමසිරි ප්රනාන්දු සහ හිටපු පොලිස්පති පූජිත් ජයසුන්දර අරභයා නඩු විභාගයක් පැවතුනත් හිටපු ජනාධිපතිවරයා විෂයෙහි මෙතෙක් චෝදනා ගොනුකිරීමක් හෝ නඩු පැවරීමක් සිදු වී නැති බවත් එම පැමිණිල්ලේ දක්වා තිබේ.
ඒ අනුව අමාත්ය ප්රසන්න රණතුංග හෙළි කළ කරුණු මුල්කරගෙන අපක්ෂපාතී විධිමත් පරීක්ෂණයක් පවත්වා වරදකරුවන්ට තරා තිරම නොබලා දඬුවම් දෙන ලෙස කතෝලික පියතුමන්ලා ඉල්ලා සිටී.
ජූඩ් ක්රිෂාන්ත ප්රනාන්දු පියතුමා ඉදිරිපත් කළ පැමිණිල්ල මෙසේය…
