මුදල් අමාත්යවරයා සහ අමරිකාවේ නිවු ෆෝට්රස් සමාගම අතර අත්සන් තැබුණු බව කී කෙළවරපිටිය යුගදනවි බලාගාරයේ රජය සතු කොටස් පැවරීමේ රහසිගත ගිවිසුම ජාතික ජන බලවේගයේ පාර්ලිමේන්තු මන්ත්රී අනුර කුමාර දිසානායක අද (10) පාර්ලිමේන්තුවේ දී සභාගත කළේය.
එම ගිවිසුම පාර්ලිමේන්තුවට ඉදිරිපත් කරන ලෙස විපක්ෂ මන්ත්රීවරුන් අවස්ථා ගණනාවක දී විදුලිබල අමාත්යවරයාට සහ මුදල් අමාත්යවරයාට බලපෑම් කරනු ලැබුවත් එය සිදුවුනේ නැත.
නමුත් අනුර කුමාර දිසානායක මන්ත්රීවරයා අද එම ගිවිසුම සභාගත කළේය. ඔහු ප්රකාශ කලේ මෙම ගිවිසුම කැබිනට් මණ්ඩලයටවත් ඉදිරිපත් නොකළ එකක් බවය.
එමෙන්ම මෙහිදී ගිවිසුමට අදාල තවත් කරුණක් හෙලි කරමින් මන්ත්රීවරයා කීවේ කැබිනට් මණ්ඩලය විසින් මුදල් අමාත්යාංශයට බලය ලබා දී තිබුණේ ඇමරිකාවේ නිවු ෆෝට්රස් සමාගම සමග ගිවිසුම අත්සන් කිරීමට වුව ද මුදල් අමාත්යාංශ ලේකම් එස්.ආර්. ආටිගල ගිවිසුම්ගත වී ඇත්තේ ඇමරිකාවේ නිව් ෆෝට්රස් සමාගම සමග නොව ඇමරිකා එක්සත් ජනපදයේ ලියාපදිංචි කර ඇති එන්.එෆ්.ඊ. ශ්රී ලංකා පවර් හෝල්ඩිං නැමැති සමාගමක් සමග බවය.
මේ අනුව මෙම ගිවිසුම මුලුමනින්ම කැබිනට් මණ්ඩලය නොමග යැවූ එකක් බව මන්ත්රීවරයා කීවේය. ගිවුසමේ 13.1 වගන්තිය උපුටා දක්වන මන්ත්රීවරයා ප්රකාශ කළේ ගිවිසුමේ අන්තර්ගත කරුණු හෝ ගිවිසුම වසර දෙකක් යනතුරු දෙපාර්ශවය අතර එකඟතාවයකින් තොරව රටට හෝ ජනතාවට ප්රසිද්ධ කිරීමෙන් වැළකී සිටිය යුතු බවට එකඟතාවයකට එළඹ ඇති බවය.
අද පාර්ලිමේන්තුවේ සභාගත කළ එම ගිවිසුම සම්පූර්ණයෙන් පහත දිගුවේ දැක්වේ.
Yugadanavi Agreement – Confidentialty clause
