ලෝක අවාධනයට ලක් වූ මානුෂීය මෙහෙයුම ඛේදවාචකයකින් නිමා වී ඇත. මොරොක්කෝවේ නළ ළිං කුහරයකට ඇද වැටී එහි සිරවූ පස් හැවිරිදි දරුවා පුංචි රයන්, ජීවිතය හැර ගියේය. ගලවා ගැනීමේ කණ්ඩායම් ඒ අසලට ලඟා වනවිට ඔහු ළිං පත්ලේම මියගොස් සිටියේය. .
ඉකුත් අඟහරුවාදා පස්වරුවේ දරුවා ළිං කුහරය තුළට ඇද වැටී තිබිණි. ඊයේ පස්වරුව වනතෙක් දින 04 ක් පුරා ඔහු මුදා ගැනීමට මොරොක්කෝ සහන සේවකයෝ දැඩි පරිශ්රමයක් සහිතව මෙහෙයුම දියත් කළහ. දරුවා වෙත ඔක්සිජන් සපයමින්, ඔහුව කැමරාවකින් නිරීක්ෂණය කරමින් ඉවසිලිවන්තව දියත් කළ මෙහෙයුම විය. අවසානයේ දරුවා වෙත සහන කණ්ඩායම් ලඟා වනවිට ඔහු මෙලොව හැර ගොස් තිබුණේය.
“දරුවා මුදාගෙන රෝහල්ගත කළා. ඒත් ඒ වනවිටත් ඔහු අප හැර ගිහින්…“ මොරොක්කෝ රජ මාලිගාව නිවේදනය කළේය.
රයන් නළ ලිං කුහරය තුළට ඇදවැටී තිබුණේ සිය පියා සහ මව සමග ඒ ආසන්නයේ රැඳී සිටි අවස්ථාවේදී ය. දෙමාපියන් මාධ්යයට පැවසුවේ දරුවා තම අවධානයෙන් මිදුණු සැනයකින් ළිං කුහරය තුළට ඇදවැටුණු බවය. දරුවා නළ ලිං කුහරය තුළට ඇදවැටී ඇති බව මව්පියන් අනාවරණ කර ගෙන තිබුණේ ඔහුගේ හැඩීම නළ ලිං කුහරය තුළින් ඇසෙන විටය.
එම ළිං කුහරය මීටර් 45 කට වඩා ගැඹුරුය. එහෙත් නළ ලිං කුහරයේ මීටර් 32 ක් පමණ ගැඹුරේදී දරුවා සිරවී තිබිණි.
මෙහෙයුම ඇරඹීම –
සිද්ධිය පිළිබඳ බලධාරීන් දැනුවත් කෙරිනි. බදාදා උදෑසන සිට ජීවිතාරක්ෂක මෙහෙයුම ආරම්භ විය. අඛණ්ඩව පැය 24 පුරා එය ක්රියාත්මක විනි.
සහන කණ්ඩායම්වල සැලසුම වූයේ නළ ළිං කුහරයට ආසන්නයේ පොළව මට්ටමේ සිට ගැඹුරට වලක් සාදා ඒ ඔස්සේ දරුවා සිටින ස්ථානයට ලඟාමය. එහෙත් එය පහසු වූයේ නැත. ළිං කුහරයේ ගැඹුරු භූ තලය අවට නායයාමේ අවදානමක් මතු වී තිබිණි. මෙහෙයුම වඩාත් කල්පනාකාරීව සිදුකළ යුතු වූයේය.
මෙහෙයුම අතරතුර දරුවා සිරවී සිටි ළිං කුහරය තුළට ඔක්සිජන් හා ජලය මෙන්ම ආහාර ද කඹයක් ආධාරයෙන් යොමු කලේය. එම කඹයේ සවිකර තිබූ කැමරාවකින් දරුවාගේ තත්ත්වය අඛණ්ඩව නිරීක්ෂණය කෙරිනි.
පොඩි එකා වතුර බිව්වා.
“හැමෝටම ස්තුතිවන්ත වෙන්න ඕන… පුතා වතුර බිව්වා… කීප සැරයක්ම එයා වතුර බිව්වා…“ කුහරය තුළට යොමු කළ ජලය දරුවා විසින් පානය කරනු තමන් නිරීක්ෂණය කළ බව ඒ තාත්තා මාධ්යයට කීවේය.
කෙසේවෙතත් 03 වන දිනය වනවිට දරුවා සිහිමූර්ජා වී සිටින අයුරු නිරීක්ෂණය වී තිබිණි. ඔහුගේ හිස ප්රදේශයට සුලු තුවාල සිදුවී ඇති බව ද පෙනුණි. එහෙත් ගලවා ගැනීමේ මෙහෙයුම දියත්කළ පිරිස බලාපොරොත්තු අත් නොහළහ. සියල්ලගේ ප්රාර්ථනාව වූයේ නිරුපද්රිතව පොඩි එකා ගොඩ ගැනීමය. ඔහු එළියට එන තුරු ප්රාර්ථනා සහිත මිනිස්සු විශාල ප්රමාණයක් අවට රොක් වී සිටියහ.
සුන් වූ ප්රාර්ථනා –
ලෝකයේ සංවේදී මිනිස්සු අති මහත් ප්රමාණයක් මේ මෙහෙයුමට මානසිකව බැඳී සිටියහ. සමාජ මාධ්ය ඔහුගේ ජීවිතය වෙනුවෙන් ප්රාර්ථනා පොදි බැඳගෙන සිටියේය.
අවසානයේ සහන සේවකයෝ රයන් වෙත ලඟා වූහ. එහෙත් ලෝකය ප්රාර්ථනා කළ තැන ඔහු සිටියේ නැත. ඔහු සියලු දෙනා හැරගොස් සිටියේය.
එහෙත් එක් දෙයක් පමණක් යලිත් ලෝකය ඉදිරියේ ප්රකට වූයේය. ඒ දරුවෙක් වෙනුවෙන් කම්පාවන මිනිසුන් සිටින ලෝකයක් තවමත් ඉතිරිවී ඇති බවය.
