සූරියවැව නුවන් ජයසේකර –
වන අලි ගැටලුවට නිශ්ඡිත විසඳුමක් නොලැබීම හේතුවෙන් ගොවි සංවිධාන 86ක් අනිද්දා ( 21 ) සිට යළි අඛණ්ඩ සත්යග්රහයක් ආරම්භ කිරීමට සූදානම් වේ.
වලව ඒකාබද්ධ ගොවි සංවිධානයේ සභාපති එස්.කේ.මහින්ද සමරවික්රම පැවසුවේ හම්බන්තොට යෝජිත වන අලි කළමණාකරණ රක්ෂිතය ගැසට් කෙරුණද මෙතෙක් ඊට අදාල කිසිදු කටයුත්තක් සිදු නොමැති වීමත්, නිළධාරීන් දුන් කිසිදු පොරොන්දුවක් ඉටු නොවීමත්? ගැසට් කෙරුණු රක්ෂිතය තුළ පවා දිගින් දිගටම මහා පරිමාණ වගා ආරම්භ කරමින් තිබීමත් හේතුවෙන් දිනෙන් දිනම උග්ර වෙමින් ඇති වන අලි ප්රශ්නයට නිශ්චිත පිළිතුරක් ලබා ගැනීම වෙනුවෙන් මෙම සත්යග්රහය ආරම්භ කරන බවය.
වලව ගොවියෝ මේ මස 21 වන දින සිට හම්බන්තොට කටුවැවදී අඛණ්ඩ සත්යග්රහයක් ආරම්භ කරන බව වලව ඒකාබද්ධ ගොවි සංවිධානයේ සභාපති එස්.කේ.මහින්ද සමරවික්රම පැවසුවේය.
සභාපතිවරයා වැඩදුරටත් මෙසේද පැවසීය.
හම්බන්තොට දිස්ත්රික්කයේ තිබෙන වන අලි ගැටලුවට විසදුමක් දෙන්න කියලා අපි අවස්ථා ගණනාවකදීම උද්ඝෝෂණ පෙළපාළි සංවිධානය කලා. බළධාරීන්ට ලිඛිත දැනුම් දීම් කළා. එකක්වත් වැඩක් වුනේ නෑ. බැරිම තැන අපි වලව ඒකාබන්ධ ගොවි සංවිධානය වටා එකතුවෙලා ඉන්න ගොවි සංවිධාන 86ක නියෝජිතයින් සමග පසුගිය ජනවාරි 18 දින සූරියවැව වල්සපුගල වැව් තාවුල්ලේ දින 108ක අඛණ්ඩ සත්යග්රහයක් සිදුකලා. අවස්ථා දෙකකදී මාරාන්තික උපවාස සිදු කළා.
එහි ප්රථිපලයක් ලෙස පසුගිය අප්රේ්ල් 09 වන දින වනජීවී රාජ්ය අමාත්යවරයාගේ අත්සනින් යුතුව හම්බන්තොට යෝජිත වන අලි කළමණාකරණ රක්ෂිතය ලෙස හෙක්ටයාර 23746ක භූමියක් ගැසට් කල බවට ගැසට් පත්රයක් පවා මුද්රණය කළා. ගොවි නියෝජිතයින් විසින් අඛණ්ඩ සතග්රහය අසලට පැමිණි දේශපාලන අධිකාරිය හා රජයේ නිළධාරීන් එක්ව එහිදී අපිට පොරොන්දු වුණා යෝජිත වන අලි කළමණාකරණ රක්ෂිතය ගැසට් කිරීමට අදාල සියලු කටයුතු කටයුතු පසුගිය අගෝස්තු මස 31 දින වන විට සිදුකර අවසන් කරන බවට.
නමුත් මේ වෙනකම් ඒ කිසිදු පොරොන්දුවක් ඉටු වී නෑ. වන අලි ගම් වදින එක හා ජන ජීවිත වන අලින්ගේ බිල්ලක් වීම මේ වන විට දිනෙන් දින උග්ර වෙලා තියෙනවා. යෝජිත වන අලි කළමණාකරණ රක්ෂිතය කියලා මුද්රණය කළ ගැසට් එක නමට විතරක් තියෙනවා. මහා පරිමාණ ව්යාපාරිකයෝ දේශපාලන හිතවතුන්ගේ ආධාර උපකාර ඇතිව තව තවත් වගාවන් සිදුකිරීමට කැලෑ ඉඩම් මහා පරිමාණයෙන් හෙළි කරමින් සිටිනවා.
ගමේ ඉන්න අසරණ ගොවියා වන අලින්ගෙන් බැට කමින් තිබෙනවා. ඒ නිසා බළධාරීන් ගිය වතාවෙත් අපිව රැවැට්ටුවා .ඒ නිසා මෙවර අපි ගොවි සංවිධාන 86ම නියෝජිතයින් හා සාකච්ඡා කරලා තීන්දුවක් ගත්තේ.
එළඹෙන 21 වන දින සිට අපි යළි අඛණ්ඩ සත්යග්රහයක් ආරම්භ කරනවා. මෙවර අපි සත්යග්රහයට වාඩි වෙන්නේ කා එක්කවත් සාම සාකච්ජා පැවැත්වීමේ අදහසින් නම් නෙමෙයි. බළධාරින්ට අපි කියන්නේ අපි අපේ අඛණ්ඩ ගොවි සත්යග්රහය නවත්වන්නේ මේ ජනතාවට සාධාරණයක් වුනොත් පමණක් යැයි පැවසීය.
