ජනාධිපතිවරයා කෙරෙහි පැවති විශ්වාසය බරතල ලෙස බිඳ වැටී ඇති බැවින් තවදුරටත් ඔහුගේ ආණ්ඩුව සමග සාකච්ඡා කරනවා ද නැද්ද යන්න පිළිබඳව තීරණයක් ගැනීමට සිදුවන බව ශ්රී ලංකා නිදහස් පක්ෂ මහ ලේකම් දයාසිරි ජයසේකර ලංකාසරට පැවසීය.
ශ්රී ලංකා නිදහස් පක්ෂය ප්රමුඛ පක්ෂ 11ක නායකයින් පසුගිය 29 දා ජනාධිපතිවරයා සමග දැඩි විශ්වාසයකින් යුතුව සාකච්ඡාවකට සහභාගීවූ බවත් එහිදී වත්මන් අගමැතිවරයා ප්රමුඛ ඇමති මණ්ඩලය විසුරුවා හැර නව අන්තර්වාර පාලනයකට එකඟ වූ ජනාධිපතිවරයා පසුව අගමැති ඉවත් කිරීමක් පක්ෂ 11 සමග සාකච්ඡා නොකළ බවට ප්රචාරය ගෙන යෑමෙන් බරපතල අවිශ්වාසයක් මතුව තිබෙන බවත් මහලේකම්වරයා කීවේය.
ශ්රී ලංකා නිදහස් පක්ෂය තම ස්ථාවරය ආරක්ෂා කරගනිමින් ජනාධිපතිවරයා සමග සාච්ඡාවට ගිය බවත් ජනාධිපතිවරයාගේ පැත්තෙන් ද එම විශ්වාසය ආරක්ෂා කරමින් කටයුතු කළ යුතු බවත් එසේ නොවෙනවා නම් ඒ ගැන තීන්දුවක් ගැනීමට සිදුවනු ඇති බවත් හෙතෙම කීය.
විපක්ෂයේ අනෙකුත් දේශපාලන පක්ෂ මෙන්ම ආණ්ඩුව ද එක මතයකට ගෙන ඒම සදහා ජනාධිපතිවරයා මැදිහත්ව ක්රියා කළ යුතුබව පෙන්වන ඔහු ඒ සඳහා මූලිකම පියවර වන්නේ වත්මන් අගමැතිවරයා ප්රමුඛ කැබිනට් මණ්ඩලය ඉවත් කර සර්ව පාක්ෂික ආණ්ඩුවක් පිහිටුවීමට අවකාශය සලසා දීම බව පෙන්වා දුන්නේය.
එසේ නොකරනවා නම්, මේ අන්තර්වාර පාලනය සම්බන්ධ සාකච්ඡාවකට හෝ විපක්ෂයේ පක්ෂ එන්නේ නැතිනම් ඉතිරිවන එකම විකල්පය ගෝඨා ගෝ හෝම් අරගලයට එක් වී එය ශක්තිමත් කිරීම බව අවධාරණය කළේය.
