මනම්පිටිය නිමල් ජයරත්න –
දිඹුලාගල ඇල්ලේවැව වැවෙහි අද (08) උදෑසන 9.00 ට පමණ දිය නෑමට ගිය පිරිමි පුද්ගලයෙකු හා දැරියක ඇතුළු කාන්තාවන් තිදෙනෙකු ඇතුළු සිව්දෙනකු දියේ ගිලී මියගොස් ඇති බව අරලගංවිල පොලිසිය කියයි.
මෙලෙස මියගොස් ඇත්තේ රත්මලාන ප්රදේශයේ සිට ඇල්ලේවැව ප්රදේශයේ ඥාති නිවසකට ගොස් වැවෙහි දිය නෑවට ගිය සිව් දෙනකු බව ඒ පිළිබඳ පරීක්ෂණ පවත්වන අරලගංවිල පොලිසිය සඳහන් කරයි.
මෙලෙස මියගොස් ඇත්තේ එෆ් 11 බංගලාවත්ත රත්මලාන ප්රදේශයේ පදිංචිව සිටි, ලිහිණි පතිරිකාද සිල්වා,[ 13] කේ. මේනකා දර්ශනී [ 30 ] ගුනානන්ද වඩුගේ රුවන් තාරක ද සිල්වා, [ 27] මල්ලිකා ආරච්චිගේ තිලෝකමා තිලකරත්න [25] බව ඒ සම්බන්ධ පරීක්ෂණ පවත්වන අරලගංවිල පොලිසිය පවසයි.
මියගිය අයවලුන් අතර මව සහ දියණියක්ද වන බව පොලිසිය පවසයි.
ඇල්ලේවැව 332 ලිපිනයේ පදිංචි කේ. රංග ප්රියදර්ශන ගේ ඥාති නිවසට ඔවුන් 08 අටවෙනිදා පැමිණීමෙන් අනතුරුව ඇලේ වැවෙහි දිය නෑමට ගොස් මෙම අනතුරට මුහුණ පා ඇති බව අරලගංවිල වැඩ බලන පොලිස් ස්ථානාධිපති ප්රධාන පොලිස් පරීක්ෂක ප්රදීප් සෙනෙවිරත්න අප කළ විමසීමකදී පැවසීය.
ඇල්ලේවැව වැවෙහි දිය නෑමට ගිය අවස්ථාවේදී පිරිමි පුද්ගලයා පළමුව ගැඹුරු ස්ථානයේ ගිලීමත් සමග ඔහු බේරා ගැනීම සඳහා මෙම කාන්තාවන් තිදෙනා වැවට පැන තිබේ. එහිදී ඔවුන්ද දියේ ගිලි ඇති බව මූලික පරීක්ෂණවලින් තහවුරු වී ඇති බව පොලිසිය සඳහන් කරයි.
අරලගංවිල පොලිස් ස්ථානාධිපති පොලිස් පරීක්ෂක ඉඳුනිල් හේමපාලගේ උපදෙස් මත අරලගංවිල වැඩ බලන පොලිස් ස්ථානාධිපති ප්රධාන පොලිස් පරීක්ෂක ප්රදීප් සෙනවිරත්න ඇතුළු පොලිස් නිලධාරී කණ්ඩායමක් මෙම අනතුරු පිළිබඳ ව වැඩිදුර පරීක්ෂණ සිදු කරයි.
