දිනසේන රතුගමගේ –
ඉලංකෙයි තමිල් අරුසු කච්චි පක්ෂය ( ITAK ) නියමිත ව්යවස්ථාවට අනුකූලව කටයුතු නොකිරීම නිසා එම පක්ෂය තහනම් කරණ ලෙසත් එහි වගකිව යුතු නිලධාරීන්ට එරෙහිව නීතිය ක්රියාත්මක කරණ ලෙසත් ඉල්ලමින් යාපනය මහාධිකරණයට ඊයේ (14 ) පෙත්සමක් ඉදිරිපත් කොට තිබේ.
එම පක්ෂයේම යාවජීව සාමාජිකයෙකු වන මාර්කණ්ඩු නඩරාජා විසින් පෙත්සම ඉදිරිපත් කොට කොට තිබේ.
පෙත්සමට අනුව වග උත්තර කරුවන් වශයෙන් මාවෙයි සේනාධිරාජා, වෛද්ය පී.සත්යලිංගම් හා එස්.කුලනායගම් යන තුන්දෙනාව නම් කොට තිබේ.
පෙත්සම මගින් පෙන්වා දී ඇත්තේ ඉලංකෙයි තමිල් අරුසු කච්චි පක්ෂයේ වැඩ බලන මහලේකම් ලෙස කටයුතු කරණ වෛද්ය පී.සත්යලිංගම් පක්ෂයේ මධ්යම කාරක සභාවේ අනුමැතියකින් තොරව පත්ව සිටීම නීති විරෝධී නිසා වහාම ඔහුගේ පත්වීම බල රහිත කරණ ලෙසයි.
මෙවර මහ මැතිවරණයට එම පක්ෂයෙන් ඉදිරිපත් වී සිටින සියලුම අපේක්ෂකයින් වෙනුවෙන් එම තැනැත්තා මහ ලේකම්වරයා වශයෙන් අත්සන් තබා ඇතත් එම අත්සන වලංගු අත්සනක් නොවන නිසා පක්ෂයෙන් ඉදිරිපත් කොට ඇති සියලුම නාම යෝජනා අවලංගු කොට අධිකරණ තීන්දුවක් ලබා දෙන ලෙසද මෙම පෙත්සම මගින් ඉල්ලීමක් කොට තිබේ.
ජනාධිපතිවරණ සමයේ සිට මේ දක්වාම ඉලංකෙයි තමිල් අරුසු කච්චි පක්ෂය කටයුතු කොට ඇත්තේ පක්ෂයේ ව්යවස්ථාවට පටහැනිව නිසා පක්ෂය යළි ප්රති සංවිධානය කෙරෙන තුරු පක්ෂයේ සියලු කටයුතු තහනම් කරමින් අධිකරණ නියෝගයක් නිකුත් කරණ මෙන්ද පෙත්සම් කරු සිය පෙත්සම මගින් ඉල්ලා තිබේ.
පක්ෂයේ ව්යවස්ථාවට අනුව සෑම වසර දෙකකටම වරක් මහ සභාව පැවැත්විය යුතු බවත් මධ්යම කාරක සභා රැස්වීම් අනිවාර්යෙන්ම මාස හයකට වරක් පැවැත්විය යුතු බවත් කියා සිටින පෙත්සම්කරු වසර හතරකින් මහ සභාවාරයක් හා මධ්යම කාරක සභවේ නිසි රැස්වීමක් පවත්වා නොමැති නිසා එම පක්ෂයට තවදුරටත් දේශපාලන කටයුතු කරගෙන යාමට අයිතියක් හෝ සදාචාරයක් නොමැති බැවින් පක්ෂය තහනම් කළ යුතු බවටද යෝජනා කොට තිබේ.
යාපනය මහාධිකරණයට ඉදිරිපත් කොට ඇති මෙම පෙත්සම විභාගයට ගැනීම පිළිබඳව අධිකරණයෙන් මෙතෙක් කිසිදු නියෝගයක් ලැබී නොමැත.
